ამოჭრილი ასფალტი და სახიფათო საცობები ახალციხის სამანქანო გზებზე

კერძოდ , ასფალტი არ არის დაგებული პარკის მიმდებარე ტერიტორიაზე – ნათენაძის და კეცხოველიც ქუჩების გადაკვეთასა და ასევე, კეცხოველისა და კოსტავას ქუჩის გადაკვეთაზე.

ორივე მონაკვეთი ახალციხის მთავარ ცენტრალურ ქუჩებშია, ორივე მონაკვეთი მოსახვევთან არის ახლოს და დილისა და საღამოს საათებში თითქმის ყოველთვის საცობებს ქმნის.

ასევე ჯერ ისევ ამოჭრილია ასფალტის საფარი ფარნავაზ მეფისა და რუსთაველის ქუჩების გადაკვეთაზე. ამ პერიოდში აღნიშნული მონაკვეთიც დატვირთულია, იმის გამო, რომ დღის საათებში მეხუთე სკოლასთან გზა იკეტება.

ახალციხის მერიაში ამბობენ, რომ აღნიშნული მონაკვეთების შეკეთება იმ კომპანიების მოვალეობაა, რომელთაც ქუჩები სხვადასხვა სამუშაოების დროს ამოჭრეს.

მაგალითად, ცენტრალურ ქუჩებში ასფალტის საფარი გარე განათების დამონტაჟების გამო ამოჭრეს. გარე განათების მონტაჟის სამუშაოებს სს „ერისიმედი“ ასრულებს და შესაბამისად, გზის შეკეთებაც მას ევალება. ახალციხის მერიაში ამბობენ, რომ როგორც კი ‘ერისიმედი’ სამუშაოებს დაასრულებს, გზების შეკეთებას დაიწყებს. სამუშაოები კი, მერიასა და „ერისიმედს“ შორის გაფორმებული ხელშეკრულების თანახმად, 24 ივლისს უნდა დასრულდეს. „ერისიმედმა“ დაზიანებული ტროტუარები უკვე შეაკეთა.

ფარნავაზ მეფისა და რუსთაველის ქუჩების გადაკვეთაზე გზა სასმელი წყლის ქსელის მოწყობის გამო დაზიანდა. ამ ქუჩაზე, ისევე, როგორც ქალაქის კიდევ რამდენიმე უბანში, მაგალითად, თამარაშვილის ქუჩაზე, სამუშაოებს შპს „ასნაფი“, ქუჩის შეკეთებას მისი მოვალეობაა. კომპანიამ გზების შეკეთება უკვე დაიწყო, მაგალითად, პირველადი სამუშაოები უკვე დაასრულა თამარაშვილის ქუჩაზე.







[ნანა მიქელაძე, ახალციხე]