როდის შეკეთდება გარე განათების მონტაჟის შედეგად დაზიანებული გზა

ახალციხეში გარე განათების ახალი სისტემის დამონტაჟების სამუშაოები ერთი თვეა მიმდინარეობს. სამუშაოებს სს „ერისიმედი“ ასრულებს, რომელიც ამ სამუშაოებზე გამოცხადებული ტენდერის ერთადერთი მონაწილე იყო. მან ტენდერი 450.821 ლარით მოიგო. თანხა ახალციხის მერიამ ადგილობრივი ბიუჯეტიდან გამოყო.

სატენდერო დოკუმენტაციის თანახმად, „ერისიმედს“ ევალება ახალციხეში მდებარე გარე განათების სისტემის მოწყობა და სარეაბილიტაციო სამუშაოების უზრუნველყოფა. კერძოდ, „ერისიმედმა“ უნდა გააკეთოს: ქ. ახალციხის გარე განათებისა და კონტროლის ეკონომ სისტემა(სადისპეჩერო); ქ. ახალციხეში, ნათენაძის და ნებიერიძის ქუჩების მიმდებარე გარე განათების ქსელის რეაბილიტაცია; ქ. ახალციხეში, კოსტავას და ნათენაძის ქუჩების მიმდებარე გარე განათების ქსელის რეაბილიტაცია; შესრულებული სამუშაოს საგარანტიო ვადა 3 წელია.

როგორც ახალციხის მერიაში განმარტავენ, ეკონომსისტემის (სადისპეჩერო) პუნქტი მერიის შენობაში დამონტაჟდება. ახალი განათება ელექტროენერგიის ხარჯს 35–40%–ით შეამცირებს.

იმ ქუჩებზე, სადაც სამუშაოები მიმდინარეობს, სამანქანო და ფეხით მოსიარულეთა სავალი ნაწილები გადაითხარა. ახალციხის მერის მოადგილე ზაზა გელაძე ამბობს, რომ ზოგიერთ ქუჩაზე გარე განათების სისტემის სადენები მიწაში მონტაჟდება და გზები ამიტომ დაზიანდა. მისივე თქმით, გზების შეკეთება „ერისიმედს“ ევალება.

„სამუშაოების ძირითადი ნაწილი უკვე შესრულებულია, როგორც კი გარე განათების მონტაჟი დასრულდება, სააქციო საზოგადოება „ერისიმედი“ დაზიანებულ გზებს შეაკეთებს, ეს მისი ვალდებულებაა. ჩვენ ამას აუცილებლად გავაკონტროლებთ“, – ირწმუნება მერის მოადგილე.

ახალციხის მერს გიორგი კოპაძესა და სს „ერისიმედის“ გენერალურ დირექტორს ალექსანდრე კოკაიას შორის გაფორმებული ხელშეკრულების თანახმად, სამუშაოები მიმდინარე წლის 24 ივლისს უნდა დასრულდეს.





[მანანა სარაშვილი, ახალციხე]