გარე განათების მეორადი ბოძებით შიდა ქუჩები განათდება

ახალციხის ცენტრალურ ქუჩებში გარე განათების ახალ, ენერგოეფექტურ სისტემას ამონტაჟებენ. ახალი სისტემა ახალ ბოძებს საჭიროებს, ძველ ბოძებს კი ჭრიან.

ქალაქ ახალციხის მერიაში ამბობენ, რომ მონტაჟსაც და დემონტაჟსაც სს „ერისიმედი“ ასრულებს. მეორად ბოძებს კი იმ ქუჩაზე გამოიყენებენ, სადაც ახალი სისტემა არ ეწყობა.

„ამ ქუჩების ჩამონათვალი ამ ეტაპზე დაზუსტებული არ არის, თუმცა, ცნობილია, რომ ერთ-ერთი ზარზმელის ქუჩა იქნება“, - ამბობს ახალციხის მერის მოადგილე ზაზა გელაძე.

ახალი სისტემა ახალციხის ცენტრალურ უბნებში მონტაჟდება. ნათენაძის, ნებიერიძის, კოსტავას, ფარნავაზ მეფის, სულხან- საბას, კეცხოველისა და დიდიმამიშვილის ქუჩებზე. სამუშაოებისთვის 450.821 ლარია გამოყოფილი.

[მანანა სარაშვილი, ახალციხე]