ფრაქციების თავმჯდომარეებს მოადგილეები ეყოლებათ – 1000–ლარიანი ანაზღაურებით

საკრებულოს რეგლამენტში შესული ცვლილებების მიხედვით, იმ ფრაქციებს, სადაც სამი წევრია, მხოლოდ ერთი მოადგილის დანიშვნის უფლება ეძლევათ. ხოლო, რომელ ფრაქციაშიც ცხრა წევრზე მეტია, შეუძლია ორი მოადგილე დაინიშნოს.

„საქართველოს ორგანულ კანონში, ადგილობრივი თვითმმართველობის შესახებ, შეტანილია ცვლილება, სადაც საუბარია ფრაქციის თავმჯდომარის მოადგილეზე, აქამდე ეს თანამდებობა არ იყო“, – განმარტა ახალციხის საკრებულოს იურიდიული კომისიის თავმჯდომარემ ვლადიმერ კურტანიძემ.

ახალციხის მუნიციპალიტეტის საკრებულოში ხუთი ფრაქციაა: „ქართული ოცნება–დემოკრატიული საქართველო“, „ევროპული საქართველო – მოძრაობა თავისუფლებისთვის“, „მრეწველობა გადაარჩენს საქართველოს“, „კოსერვატორები“ და“მწვანეები“. ამ ხუთი ფრაქციიდან, ყველაზე მეტი, 16 წევრი „ქართული ოცნება–დემოკრატიული საქართველოს“ ჰყავს. სამ–სამი წევრი ჰყავთ „ევროპულ საქართველოს“ და „მწვანეებს“, ხუთი წევრია „კონსერვატორებში“, ხოლო ოთხი – „მრეწველებში“.

ფრაქციის თავმჯდომარის მოადგილის დანიშვნის მოთხოვნით საკრებულოს უკვე მიმართა „ევროპული საქართველოს“ თავმჯდომარემ გელა დემეტრაძემ. მისი მოადგილე ირინა გელაშვილი იქნება. მისი არჩევა საკრებულომ 31 იანვარს გამართულ საკრებულოს სხდომაზე ცნობად მიიღო.



საკრებულოს ფრაქციის თავმჯდომარის მოადგილის ყოლის მოთხოვნით საკრებულოს უკვე მიმართეს სხვა ფრაქციის ხელმძღვანელებმაც.
უკვე ცნობილია, რომ „ოცნების“ ფრაქციის თავმჯდომარეს, რადგან მასში 16 დეპუტატია, ორი მოადგილე ეყოლება, „კონსერვატორებს“ და „მრეწველებს“ თითო–თითო.

„მხოლოდ ფრაქცია „მწვანეების“ თავმჯდომარეს არ ეყოლება მოადგილე, ეს დეპუტატები „ქართული ოცნების“ კვოტით არიან გასულები და ამის უფლება არ აქვთ“, – განმარტა ახალციხის მუნიციპალიტეტის საკრებულოს თავმჯდომარემ გელა ნოზაძემ.

მისივე თქმით, საკრებულოში ფრაქციების თავმჯდომარეებს ჯამში ხუთი მოადგილე ეყოლებათ.

[თინათინ ზაზაძე, ახალციხე]