ახალციხის საკრებულოში ფრაქციების შესაქმნელად ჯერ ორი განაცხადი შევიდა

ახალციხის მუნიციპალიტეტის საკრებულოს ფრაქციის შექმნაზე განცხადებით „ევროპულმა საქართველომ“ პირველივე სხდომაზე მიმართა. ფრაქცია „ევროპული საქართველო–მოძრაობა თავისუფლებისათვის“ სამი წევრისაგან იქნება დაკომპლექტებული და მას გელა დემეტრაძე უხელმძღვანელებს.

ფრაქციის წევრი დემეტრაძესთან ერთად ირინა გელაშვილი იქნება. რაც შეეხება მესამე წევრის ვინაობას ჯერ გარკვეული არაა. რადგან პარტიის სიის პირველი ნომერი ვაჟა ჩიტაშვილი საკრებულოში შესვლაზე უარს აცხადებს, უფლებამოსილების შეწყვეტის მიზნით კი მან საკრებულოს თავმჯდომარეს გელა ნოზაძეს უნდა მიმართოს.

ამ დროისათვის საკრებულოში კიდევ ერთმა ფრაქციამ „ქართული ოცნება–დემოკრატიულმა საქართველომ“ შეიტანა დასარეგისტრირებლად განაცხადი. „ოცნების“ ფრაქცია 16 დეპუტატისგან დაკომპლექტდა და თავმჯდომარე გიორგი გვარამაძე დაასახელა.

რაც შეეხება უმრავლესობის სხვა დეპუტატებს ფრაქციის შექმნის თაობაზე საკრებულოსთვის მათ ჯერ არ მიუმართავთ.

ახალციხის საკრებულოში ფრაქციის გარეშე რჩება „ნაციონალური მოძრაობა“, რომელსაც მხოლოდ ორი მანდატი აქვს. ფრაქციის შესაქმნელად კი სამი, ან სამ დეპუტატზე მეტია საჭირო.



[ლუბა გიორგაძე, ახალციხე]