ვალეს საბავშვო ბაღში სასწავლო პროცესი თებერვლიდან განახლდება

ახალციხის მუნიციპალიტეტის ბაღებში სწავლა რვა იანვრიდან განახლდა, თუმცა ვალეს ახლადგარემონტებული ბაღი ამ პროცესში ვერ ჩაერთო. როგორც ახალციხის მუნიციპალიტეტის მერიაში აცხადებენ, შენობაში სარემონტო სამუშაოები დასრულებულია, თუმცა ამჯერად სირთულე გათბობის სისტემამ შექმნა: „ბუნებრივია, გათბობის გარეშე ბავშვებს შენობაში ვერ შევიყვანდით. ყველაფერი გვარდება და სწავლას თებერვლის დასაწყისიდან განაახლებენ“.

ვალეს ბაღის შენობის გარე ფასადის რემონტი ჯერ კიდევ მიმდინარეობს, თუმცა მერიაში ამბობენ, რომ ეს სასწავლო პროცესს ხელს არ შეუშლის.

შეგახსენებთ, რომ ვალეს საბავშვო ბაღში სარემონტო სამუშაოები 2017 წლის 20 სექტემბერს უნდა დასრულებულიყო, თუმცა შენობის რეაბილიტაცია წლის ბოლოს მოხერხდა. ასევე წლის ბოლოს ბაღის რეაბილიტაციაზე დასაქმებულები ხელფასების მიღების მოთხოვნით საპროტესტო აქციებს მართავდნენ.

[თამუნა უჩიძე, ახალციხე]