რატომ არ განახლდა სასწავლო პროცესი ახალციხის მუნიციპალიტეტის ბაღებში

ახალციხის მუნიციპალიტეტის სოფელ წინუბანში მცხოვრებმა მარეხ გოგოლაძემ ბავშვი აწყურის საბავშვო ბაღში დღეს, 11 იანვარს დილით მიიყვანა, თუმცა დაკეტილი დახვდა.

„ბაღის ზეიმზე გვითხრეს, რომ სწავლას 11–ში დაიწყებდნენ, მაგრამ კარი დაკეტილი იყო“, – ამბობს გოგოლაძე.

სასწავლო პროცესი რომ 11 იანვარს უნდა განახლებულიყო ამაზე აწყურში მცხოვრები სხვა აღსაზრდელების მშობლებიც საუბრობენ.

აწურის საბავშვო ბაღის მენეჯერი ივეტა ტვილდიანი აცხადებს, რომ სასწავლო პროცესი 20 იანვარს განახლდება: „ბაღების გაერთიანებაში გვითხრეს, რომ სწავლა ტენდერებთან დაკავშირებით გადაიდო და 20 იანვარს დაიწყება“.

სასწავლო პროცესი რომ გადაიდო, ამაზე სხვილისის საბავშვო ბაღის მენეჯერი თინიკო ხუციშვილიც საუბრობს.

„არ ვიცი სწავლა რამდენი ხნით გადაიდო“, – გვითხრა მან, თუმცა მოგვიანებით დაგვიკავშირდა და განაცხადა, რომ როგორც ბაღების გაერთიანებაში გაარკვია, სწავლა 20 იანვარს განახლდება.

ახალციხის მუნიციპალიტეტის სკოლამდელი აღზრდის დაწესებულებათა გაერთიანების ხელმძღვანელი ლელა ზაზაძე ამბობს, რომ თავიდანვე სასწავლო პროცესის დაწყება 20 იანვირისთვის იყო გათვალისწინებული: „ტენდერის გამო ბაღების გაერთიანებას პრობლემა არ შექმნია".

თუმცა, სასწავლო პროცესის შეწყვეტამდე ზაზაძე "სამხრეთის კარიბჭესთან" აცხადებედა, რომ საბავშვო ბაღებში სწავლა 4 იანვარს დაიწყებოდა.

ახალციხის მუნიციპალიტეტის სოფელბში 10 საბავშვო ბაღი და 515 აღსაზრდელია.

[თამუნა უჩიძე, ახალციხე]