ვალეს საბავშვო ბაღში სასწავლო პროცესი წლის ბოლომდე განახლდება

ვალეს საბავშვო ბაღში შიდა სარემონტო სამუშაოები დასრულდა, ეზოსა და გარე პერიმეტრის რეაბილიტაცია კი ჯერ ისევ მიმდინარეობს.

„შენობას ასუფთავებენ ახლა, ასევე პარალელურად შეაქვთ ავეჯი. წლის ბოლომდე ბავშვები შევლენ და ახალ წელს იზეიმებენ“, – ამბობს ახალციხის მუნიციპალიტეტის მერიის ზედამხედველობის სამსახურის უფროსი ემზარ მღებრიშვილი.

საბავშვო ბაღში სარემონტო სამუშაოების მიმდინარეობის გამო სამი თვის განმავლობაში 23 თანამშრომელი უხელფასო შვებულებაში იყო.

„დეკემბერიდან სამსახურში ჩვეულბრივ გავიდნენ, შენობას სასწავლო პროცესის დასაწყებად ამზადებენ. შესაბამისად, დეკემბრის ხელფასებს მიიღებენ“, – ამბობს ახალციხის თემის ბაღების გაერთიანების ხელძღვანელი ლელა ზაზაძე.

შეგახსენებთ, რომ ვალეს საბავშვო ბაღში სარემონტო სამუშაოები 9 ივნისს დაიწყო და პროექტი სახელშეკრულებო პირობების მიხედვით 20 სექტემბერს უნდა ჩაებარებინათ. თუმცა, მოგვიანებით ახალციხის მუნიციპალიტეტის გამგეობამ ბაღში რემონტის დასასრულებლად კიდევ ერთი ტენდერი გამოაცხადა. მიუხედავად ამისა, გამგეობაში ირწმუნებოდნენ, რომ ამის გამო სასწავლო პროცესი არ შეფერხდებოდა და სწავლა სექტემბრის ბოლოდან ჩვეულებრივ განახლდებოდა, პარალელურად კი მეორე ეტაპის სარემონტო სამუშაოები გაგრძელდებოდა, რაც ძირითადად გარე პერიმეტრის რეაბილიტაციას გულისხმობდა. თუმცა, სამშენებლო კომპანიამ შპს „ქრისტინე სარაშვილმა“ ხელშეკრულებით ნაკისრი ვალდებულებები ვერ შეასრულა, რის გამოც გამგეობამ ყოველთვიურად ჯარიმა 950 ლარი დააკისრა.

[თამუნა უჩიძე, ახალციხე]