ასპინძაში საბავშვო ბაღის აღსაზრდელებისთვის სასწავლო პროცესი ხვალიდან განახლდება

დაბა ასპინძის მეორე საბავშვო ბაღში სარემონტო სამუშაოებისთვის ემზადებიან. ამავე ბაგა–ბაღის მენეჯერის მაია სიდამონიძის განმარტებით, ინვენტარის გადატანა პირველ ბაღში უკვე სრულდება და სასწავლო პროცესი ხვალიდან, 18 თებერვლიდან, დაიწყება.

„ნივთების გადმოტანის პროცესი მთავრდება. ჩვენც აქტიურად ვეხმარებით, ჩვენი სამეცადინო მასალა და ინვენტარი მოგვაქვს“, – ამბობს სიდამონიძე და ამატებს რომ პირველ ბაღში საკმარისი ოთახებია და აღსაზრდელების მიღების პრობლემა არ ექნებათ.

ასპინძის მუნიციპალიტეტის გამგეობაში განმარტავენ, რომ ბაგა–ბაღში საკვები პროდუქტების მომარაგება უკვე დაწყებულია და სასწავლო პროცესი უპრობლემოდ აღდგება.

“პირველი ბაღის კონტიგენტი ხვალიდან დაიწყებს მუშაობას, მეორე ბაღის კი ზეგიდან. ღუმელები ჩამოვიტანეთ ზედა ბაღიდან, ცარიელი ოთახები ბევრია, უბრალოდ პირობები არ არის. გარემონტების შემდეგ ორივე ბაღში 600–მდე ბავშვს მივიღებთ“, – ამბობს ასპინძის მუნიციპალიტეტის გამგებლის პირველი მოადგილე ალექსანდრე პაპაშვილი.

ბაღების რეაბილიტაციისთვის მსოფლიო ბანკიდან 900,101.60 ლარია გამოყოფილი. სარეაბილიტაციო სამუშაოები 10 თვის განმავლობაში გაგრძელდება.სამუშაოებს შპს „რესტავრატორები და კომპანია“ ასრულებს.

შეგახსენებთ, დაბა ასპინძაში ორ საბავშვო ბაღში, სადაც 200-მდე აღსაზრდელია, სასწავლო პროცესი 11 თებერვალს შეწყდა.



[თინათინ ზაზაძე, ასპინძა]