TDI – იმ ადიგენის მერიას სასამართლო პროცესი მოუგო

დღეს, 12 დეკემბერს ახალციხის რაიონულ სასამართლოში ადიგენის მერიის წინააღმდეგ TDI– ის დაწყებული სასამართლო პროცესი დასრულდა. ადიგენის გამგეობას დაევალა „ტოლერანტობისა და მრავალფეროვნების ინსტიტუტს“ მიაწოდოს სრული ინფორმაცია, გაიცა თუ არა მშენებლობის ნებართვა მოხეში მშენებარე მეჩეთთან დაკავშირებით.

„ადიგენის მერიამ ორჯერ გაუგზავნა მიმართვა TDI– ის, თუმცა გაიცა თუ არა ნებართვა მეჩეთის მშენებლობასთან დაკავშირებით არ ეწერა. მერიას დაევალა სრული ინფორმაცია მიაწოდოს ორგანიზაციას“, – განაცხადა სასამართლო სხდომაზე მოსამართლე გოჩა ჯეირანაშვილმა.

დღევანდელ სასამართლო პროცესს მოსარჩელე მხარე არ დასწრებია. ადიგენის მუნიციპალიტეტის მერიის იურისტმა, რომელიც სასამართლო პროცესზე მოპასუხე მხარეს წარმოადგენდა, კომეტარი არ გააკეთა.

შეგახსენებთ, რომ „ტოლერანტობისა და მრავალფეროვნების ინსტიტუტმა“ (TDI) ადიგენის მუნიციპალიტეტის გამგეობიდან სოფელ მოხეში მშენებარე ახალი მეჩეთის თაობაზე საჯარო ინფორმაცია გამოითხოვა, მათ შორის, მეჩეთის მშენებლობის ნებართვასთან დაკავშირებული ინფორმაცია და სამართალწარმოების მასალები, თუმცა ორგანიზაციამ აღნიშნული ინფორმაცია სრულად ვერ მიიღო.

„ახალი მეჩეთის მშენებლობა უნდა მოექცეს სამართლებრივ ჩარჩოებში, რათა საფრთხე არ შეექმნეს მომავალში არც მეჩეთს და არც მლოცველებს. TDI–ი გააგრძელებს ადვოკატირებას, რომ ძველი სადავო შენობა დაუბრუნდეს მუსლიმ თემს, ის ფაქტი, რომ ახალი მეჩეთი შენდება არ უშლის ხელს ძველის დაბრუნებას“, – განაცხადა სატელეფონო საუბარში TDI–ის იურისტმა გვანცა ლომაიამ.

[თინათინ ზაზაძე, ადიგენი]