ადიგენის მერიის წინააღმდეგ TDI– ის საჩივარის განხილვა დასრულდა

„ტოლერანტობისა და მრავალფეროვნების ინსტიტუტმა“ (TDI) ადიგენის მუნიციპალიტეტის გამგეობიდან სოფელ მოხეში მშენებარე ახალი მეჩეთის თაობაზე საჯარო ინფორმაცია გამოითხოვა, მათ შორის, მეჩეთის მშენებლობის ნებართვასთან დაკავშირებული ინფორმაცია და სამართალწარმოების მასალები, თუმცა ორგანიზაციამ აღნიშნული ინფორმაცია ვერ მიიღო.

აღნიშნულ საქმეზე სხდომა დღეს, რვა იანვარს გაიმართა. პროცესზე ადიგენის მერიის იურისტმა მადონა გულიაშვილმა განაცხად, რომ ადიგენის თვითმმართველობას მოხეში მეჩეთის მშენებლობის შესახებ ნებართვა არ გაუცია, შესაბამისად ინფორმაციას ვერც TDI–ის მიაწვდიდა.

„ეს რა თქმა უნდა საჯარო ინფორმაციაა. რომ გვქონოდა უნდა გაგვეცა კიდეც, მაგრამ მერიას ნებართვა არ გაუცია, რადგან მეჩეთის აშენების ნებართვაზე ჩვენთვის განცხადებით არავის მოუმართავს“,–განაცხადა სხდომაზე გულიაშვილმა და სასამართლოსთან საქმის წარმოების შეწყვეტით იშუამდგომლა, თუმცა მოსამართლე გოჩა ჯეირანაშვილმა მისი შუამდგომლობა არ დააკმაყოფილა.

TDI–ის იურისტის გვანცა ლომაიას თქმით კი ადიგენის თვითმმართველობას მათთვის გაგზავნილ ინფორმაციაში სწორედ ის უნდა მიეთითებინა, რომ მეჩეთის მშენებლობაზე მას ნებართვა არ გაუცია, რადგან მერიისთვის ამ მოთხოვნით არავის მიუმართავს.

TDI–ის იურისტის შოთა თუთბერიძის თქმით, მიუხედავად იმის რომ ადგილობრივ თვითმმართველობას მოხეში მეჩეთის მშენებლობის ნებართვა არ გაუცია, სოფელში სალოცავის მშენებლობა მაინც გამართლებულია: „ამ ამბავს წინ ბევრი ხმაურიანი პროცესი უძღვოდა და ყველა დეტალის შესახებ საქმის კურსში იყო ადიგენის თვითმმართველობა, ამიტომ ტექნიკური საკითხები, იგივე ნებართვის გაცემის ამბავი თავად უნდა მოეგვარებინა“.

თუთბერიძე შექმნილ ვითარებაში გარკვეულ საფრთხეს ხედავს: „ნებართვის არ გაცემით, თვითმმართველობამ მეჩეთის მშენებლობაში ნაღმი ჩადო, რომ მოუნდეს მეჩეთის დანგრევა, დაანგრევს და თავსაც იმართლებს, რომ თავის დროზე მას მშენებლობაზე ნებართვა არ გაუცია“.

სრულიან საქართველოს მუსლიმთა სამმართველოს მუფთი ბეგლარ ქალაშიძე აცხადებს, რომ „მოხეში მეჩეთის მშენებლობასთან დაკავშირებით არანაირი გაურკვევლობა არ არსებობს, ეს გადაწყვეტილება თავის დროზე კომისიამ მიიღო და ტექნიკურ დეტალებსაც ეტაპობრივად აგვარებენ“.

სწორედ ამ დეტალებთან დაკავშირებული ადმინსიტრაციული სარჩელის განხილვა დღეს დასრულდა. სასამართლო გადაწყვეტილებას 12 იანვარს, 12:00 საათზე გამოაცხადებს.

[ლუბა გიორგაძე, ახალციხე]