ვანო მერაბიშვილის დაკავება - შეფასებები მშობლიური მხარიდან

ადიგენის მუნიციპალიტეტში მცხოვრები მოსახლეობა ვანო მერაბიშვილის დაკავებას ეხმაურება. ”სამხრეთის კარიბჭეს” მიერ გამოკითხული რესპოდენტების უმეტესობას მიაჩნია, რომ დამნაშავე ყველა შემთხვევაში უნდა დაისაჯოს და არ აქვს მნიშვნელობა ვინ იქნება.

”თუ დამნაშავეები არიან, ყველამ პასუხი უნდა აგოს. კანონი ყველასთვის უნდა არსებობდეს. უბრალო ხალხს კარგად იჭერენ. მარტო მერაბიშვილი კი არა, ყველა მოქალაქე უნდა დაისაჯოს, გინდა მერაბიშვილი იყოს, გინდა სააკაშვილი და გინდა ივანიშვილი. კანონი კანონი უნდა იყოს და ის კი არა, რომ მე მთავრობის პირი ვარ და რაც მინდა იმას გავაკეთებ”, - ამბობს მაია არუთუნოვა.

იგივე მოსაზრება აქვს აბასთუმანში მცხვრებ ოთარ ჯიხვაშვილს. მისი თქმით, თუ მერაბიშვილი დამნაშავეა, უნდა დაისაჯოს.

”ტყუილად არავინ დაიჭერდა, თუ დამნაშავეა, უნდა დაისაჯოს კიდეც. ჩვენთვის არც კარგი გაუკეთებია და არც ცუდი, სულ ერთხელ გვყავს ნანახი”, - ამბობს იგი.

ის, რომ დანაშაულის გარეშე მერაბიშვილს არავინ დააკავებდა, სოფელ ვარხანში მცხოვრებმა ნუგზარ იაკობიძემაც აღნიშნა: ”სამართლიანი იყო აბა რაა, დააშავე? მაშინ აგე პასუხი”.

რესპოდენტთა ნაწილი ვანო მერაბიშვილს დადებით პიროვნებად ახასიათებს და ამბობს, რომ ადიგენის მუნიციპალიტეტისთვის მას ბევრი კარგი საქმე აქვს გაკეთებული. ადგილობრივები ფიქრობენ, რომ მერაბიშვილი დამნაშავე არ იქნება, თუმცა ეს სასამართლოს გადასაწყვეტია.

”ჩვენი რაიონის ღირსეული წარმომადგენელი იყო პარლამენტში და ჩვენ ძალიან დადებითად ვართ მის მიმართ განწყობილი. სამართლიანი იყო თუ არა მისი დაკავება, ეგ უკვე სამართალდამცავების საქმეა და არა ჩვენი. ჩვენ შორიდან რასაც ვხედავთ, ერის და სამშობლოს კაცია, დანარჩენი ჩვენი შესაფასებელი არაა”, - ამბობს ადიგენის მუნიციპალიტეტის სოფელ ვარხანში მცხოვრები ქეთევან მსხვილიძე.

[თამარ თოთაძე, ახალციხე]