ვანო მერაბიშვილი ციხიდან ისევ კლინიკაში გადაიყვანეს

"ეს უკვე მეხუთე გაყვანაა მერაბიშვილის სამოქალაქო კლინიკაში. სამწუხაროდ, ჯერ კიდევ არ აგვიღია წინა კვლევები, რომელიც მერაბიშვილს „ავერსის“ კლინიკაში ჩაუტარდა. სამწუხაროდ, ჩვენ არ გვეძლევა შესაძლებლობა ეს დასკვნები და სამედიცინო ანგარიშები მივაწოდოთ უცხოელ ექიმებს, რათა გავიაროთ მათთან კონსულტაცია. ეს ყველაფერი რეალურად ძალიან დიდ ეჭვებს ბადებს უკვე, ვინაიდან უკვე მეხუთედ გახდა საჭირო მისი სამოქალაქო საავადმყოფოში გაყვანა", – ამბობს მერაბიშვილის ადვოკატი გიორგი ჩივიაშვილი.

მისი თქმით, იუსტიციის მინისტრის თეა წულუკიანის განცხადება იმის შესახებ, რომ მერაბიშვილს არაფერი სჭირს სიცრუეა: "დღემდე არაა დასმული დიაგნოზი. ჩვენ არ ვიცით, რა სჭირს მერაბიშვილს. სამწუხაროდ, ხელისუფლებამ ვერ მოახერხა, რომ მას დიაგნოზი დაუსვას და სწორი, ადეკვატური მკურნალობა ჩაუტაროს. ფაქტი ერთია, რომ დიაგნოზი მათ არ აქვთ და არ მკურნალობენ ამ ადამიანს იმის მიხედვით, რაც სჭირს. იმედია, დღეს მაინც მოახერხებენ და მოგვცემენ წინა კვლევების პასუხებს. ძალიან დიდი ეჭვი მაქვს, რომ რაღაცას გვიმალავენ, აქვს ფალსიფიცირების მცდელობას ადგილი, რადგან ჩვენთვის მიუწვდომელია „ავერსის“ კლინიკაში ჩატარებული კვლევების პასუხები", – აცხადებს გიორგი ჩივიაშვილი.

ადვოკატი კიდევ ერთხელ მიმართავს პენიტენციურ სამსახურს, რომ ვანო მერაბიშვილი ისეთ კლინიკაში გადაიყვანონ, სადაც უცხოელ ექიმებს ექნებათ შესაძლებლობა მას კვლევები ჩაუტარონ.

[sknews.ge]