რატომ მიაჩნია ვანო მერაბიშვილის განაჩენი დაუსაბუთებლად ვაჟა ჩიტაშვილს?

ქუთაისის საქალაქო სასამართლოს გადაწყვეტილებით, ყოფილ პრემიერ-მინისტრს ვანო მერაბიშვილს თავისუფლების აღკვეთა ხუთი წლის ვადით 17 თებერვალს მიესაჯა. ახალციხის მუნიციპალიტეტის მაჟორიტარი დეპუტატი „ერთიანი ნაციონალური მოძრაობიდან ვაჟა ჩიტაშვილი ქუთაისის საქალაქო სასამართლოს გადაწყვეტილებას დაუსაბუთებელს უწოდებს.

„უნდა იყოს არაერთი დასაბუთებული მტკიცებულება, რომ ესა თუ ის ადამიანი არის დამნაშავე. უნდა ემყარებოდეს უტყუარ მტკიცებულებებათა ერთობლიობას და ამის შემგდომ უნდა დადგინდეს გამამტყუნებელი განაჩენი. არცერთ ეპიზოდში ვანო მერაბიშვილს არანაირი პირადი გამორჩენა არ ჰქონია, მსგავსი გადაცდომა სასამართლო პროცესზე არ დადასტურებულა. ამიტომ, მიმაჩნია ეს განაჩენი დაუსაბუთებლად“, - ამბობს იგი.

მისივე თქმით, თავიდანვე უკანონო იყო მერაბიშვილის დაკავება და აღკვეთის ღონისძიებაც არასწორად იყო შერჩეული: „ეს ადამიანი არ ემალებოდა გამოძიებას, თანამშრომლობდა, მტკიცებულებებს არ ანადგურებდა და თავის დროზე ცხადდებოდა დაკითხვაზე. მაგრამ მაინც დააპატიმრეს“.

შეგახსენებთ, რომ ქუთაისის საქალაქო სასამართლოს გადაწყვეტილებით, ყოფილ პრემიერმინისტრს ვანო მერაბიშვილს 5 წლით თავისუფლების აღკვეთა მიესაჯა და აეკრძალა თანამდებობის დაკავება 1 წლის და 6 თვის ვადით. რაც შეეხება ყოფილ ჯანდაცვის მინისტრს ზურაბ ჭიაბერაშვილს, მას ქუთაისის საქალაქო სასამართლოს მოსამართლემ ნათია ბარბაქაძემ 50 ათას ლარიანი ჯარიმა დააკისრა.

[თამარ თოთაძე, ახალციხე]