ახალციხეში შშმ პირების ნამუშევრების გამოფენა-გაყიდვა იმართება

გამოფენა-გაყიდვა „ტალიტა -კუმში“ 11 მარტს, დღეს, გაიხსნა და ორ დღეს გაგრძელდება. მსურველებს თექის აქსესუარების: თმისაკეთების, პეპლების, ყვავილების, კალათების და ა.შ. შეძენა ახალციხეში, გვარამაძის ქუჩა N42-ში, 14:00-დან 16-00 საათამდე შეუძლიათ.

„შემოსული თანხით ახალი მასალას შეძენას ვგეგმავთ“, - ამბობს ცენტრის პედაგოგი, ფიზიოთერაპიის ასისტენტი მელანო ჩილინგარაშვილი.

„ტალიტა კუმში“ რეაბილიტაციას შეზღუდული შესაძლებლობის მქონე 10 პირი გადის, მათი ასაკი 15 წლის ზემოდან იწყება. ბენეფიციარები ცენტრში არტ-თერაპიის კურსს გადიან, სწავლობენ მუსიკას, სხვადასხვა ხელსაქმეს, სომეხი ეროვნების ბენეფიციარები - ქართულ წერა-კითხვას.

ცენტრი დილის 10:00 საათიდან 16:00 საათამდე მუშაობს. ბენეფიციარებს სპეციალურად მათთვის განკუთვნილი პანდუსიანი მიკროავტობუსი ემსახურება. „ტალიტა-კუმში“ მათ ერთჯერადი კვებაც აქვთ.

ახალციხის კათოლიკურ ეკლესიასთან არსებული შშმ პირების სარეაბილიტაციო ცენტრი „ტალიტა კუმი“ ახალციხეში ოთხი წელია არსებობს, თუმცა ოფიციალურად და საზეიმოდ წელს, 8 მარტს გაიხსნა და იკურთხა. საზეიმო გახსნას მართლმადიდებელი და კათოლიკე სასულიერო პირები დაესწრნენ. ცერემონიაზე ადგილობრივი თვითმმართველობის წარმომადგენლებიც იყვნენ დაპატიჟებული, თუმცა მათგან არავინ მისულა.

შშმ მქონე პირების სარეაბილიტაციო ცენტრი „ტალიტა კუმი“ ბერლინის „MALTESER” ორგანიზაციის, ავადმყოფთა მომსახურე სასულიერო პირთა ორდენის „კამელიელი სნეულთა მსახურნის“ და წმ. ნინოს დების კონგრეგაციის წევრთა ერთობლივი პროექტია.
„ტალიტა კუმში“ ამბობენ, რომ ცდილობენ მათი დღეები ერთფეროვანი არ იყოს. ხშირად აწყობენ სხვადასხვა ღონისძიებებს.
უახლოეს დღეებში ბენეფიციარები მშობლებთან ერთად სამების საკათედრო ტაძარში, მამა გაბრიელის ნეშტის მოსალოცად გაემგზავრებიან. მგზავრობის ხარჯს ავადმყოფთა მომსახურე სასულიერო პირთა ორდენის „კამელიელი სნეულთა მსახურნის“ ხელმძღვანელი მამა პავლე დილი და ადგილობრივი თვითმმართველობა დაფარავს.

„მართალია ადგილობრივი თვითმმართველობიდან ცენტის გახსნაზე არავინ მოვიდა, მაგრამ მოსალოცად წასვლაში გვეხმარებიან. მინდა ვთხოვო ყველას, ვისაც ექნება სურვილი, შემოწირულობის ან ქველმოქმედების სახით დაგვეხმარონ, ამით შევძლებთ ბენეფიციარები საზაფხულო ბანაკში წავიყვანოთ“, - ამბობს მელანო ჩილინგარაშვილი.

[თინათინ ზაზაძე, ახალციხე]