საბარგო სადგურზე საქალაქო ტრანსპორტის დანიშვნას ითხოვენ

ახალციხის შემოსასვლელში მდებარე საბარგო სადგურის დასახლებას საქალაქო ავტობუსი არ ემსახურება. აქ მცხოვრებლებს ქალაქამდე მისასვლელად თბილისიდან, ან ახალციხის ხვადასხვა სოფლებიდან მომავალი ტრანსპორტის ლოდინი უხდებათ.

„საათობით უნდა იდგე და ელოდო რაღაცამ გამოიაროს, ხშირად ადგილები არ აქვთ და არც გვიჩერებენ. რა იქნება, ის ავტობუსი, რომელიც ქალაქში დადის, ყოველ საათში ერთხელ „ტავარზეც“ რომ მოვიდეს?!“ – ამბობს საბარგო სადგურზე მცხოვრები მანუშაკ გასპარიანი.
მისი მეზობლების თქმით, ტრანსპორტის გარეშე ქალაქს მოწყვეტილი არიან.

„ავტობუსი გვინდა რომ დანიშნონ აქაც. მე აწყურის ავტობუსს ველოდები ხოლმე სულ. ამ საკითხზე საუბარი ქალაქის ყოფილ მერთან ბევრჯერ გვქონდა, მაგრამ არაფერი შეცვლილა“, – ამბობს მარინე კუჭაძე.

ახალციხის ყოფილ მერს ვლადიმერ ზედგინიძეს საბარგო სადგურის დასახლებაში საქალაქო ტრანსპორტის შესახებ იქამდე ვესაუბრეთ, ვიდრეუფლებამოსილება შეუწყდებოდა. ზედგინიძე ამბობდა, რომ ვიდრე ქალაქს საკუთარი ავტოპარკი არ ეყოლება, ამ პრობლემის მოგვარება შეუძლებელი იქნება.

„საქალაქო ტრანსპორტის მომსახურების საშუალება ქალაქს გარკვეული პერიოდი ვერ ექნება, რადგან ადგილობრივი ბიუჯეტით ავტოპარკის ქონის ფუფუნება ვერ მოხერხდება. ახლა ქალაქს კერძო კომპანიის ავტობუსი ემსახურება და მაშინ ისევ მას უნდა ვთხოვოთ, რომ მარშრუტში საბარგო სადგურიც ჩასვას“, – ამბობს ზედგინიძე.

საბარგო სადგურზე ტრანსპორტთან დაკავშირებული პრობლემების შესახებ ახალციხის მუნიციპალიტეტის ახალი მერი ზაზა მელიქიძე ინფორმირებულია. მისი თქმით, იგი ადგილობრივებს ამ საკითხის გადაჭრას წინასაარჩევნოდ დაჰპირდა: „მოსახლეობას დავპირდი, რომ გაზაფხულიდან, ამ დასახლებაში საგზაო ინფრასტრუქტურის მოწესრიგების შემდეგ, საქალაქო ტრანსპორტი ივლის. ტრანსპორტის კერძო კომპანიას ჩვენ დაველაპარაკებით“.

ახალციხეში საქალაქო ტრანსპორტით მოსახლეობას კომპანია „ჯეოტივი“ ემსახურება. მასთან გაფორმებული მემორანდუმის საფუძველზე, 2017 წელს ქალაქის მერია 50%–იან თანადაფინანსებაში შედიოდა და ადგილობრივი ბიუჯეტიდან 22 ათას ლარს ურიცხავდა. რამდენი ათასი ლარით გაიზრდება თვითმმართველობიდან გამოყოფილი თანხა კერძო კომპანიისთვის, იმ შემთხვევაში თუ ის მარშრუტს გაზრდის, ჯერ უცნობია.

მელიქიძე ირწმუნება, რომ გაზაფხულიდან წინასაარჩევნოდ დადებულ დაპირებას აასრულებს: „ანალოგიური პრობლემა სხვა დასახლებებსაც აქვს, ტრასნპორტი ყველგან დაინიშნება“.

[თამუნა უჩიძე, ახალციხე]