ახალგაზრდები საქალაქო ტრანსპორტის შეცვლის ინიციატივით გამოდიან

ახალციხელმა ახალგაზრდებმა, ახალციხის საკრებულოში ფრაქცია „ნაციონალური მოძრაობის“ თავმჯდომარეს მალხაზ გიქოშვილს იმ დადგენილების პროექტი გააცნეს, რომლის მიხედვითაც მათ საქალაქო ტრანსპორტის პირობების გაუმჯობესება სურთ.

ახალგაზრდებმა გიქოშვილს, ამ დადგენილების პროექტის საკრებულოში ინიცირება სთხოვეს. თუ საკრებულო ამ პროექტს მიიღებს, მომავალში მერია საქალაქო ტრანსპორტით მომსახურებისათვის ტენდერს სწორედ აქ მითითებული პირობების მიხედვით გამოაცხადებს.

პროექტის ავტორების თქმით, ახალციხეში არსებული საქალაქო ტრანსპორტი, რომელიც შპს „ჯეო ტივის“ ეკუთვნის, ტექნიკურად გაუმართავია, ზაფხულში დახურულია ფანჯრები და არ არის კონდინცირება, ასევე, ტრანსპორტში ადგილებია არასაკმარისი და დარღვეულია მოძრაობის განრიგიც. ამ ყველაფრის ამსახველი ფოტო და ვიდეო მასალა ახალგაზრდებმა გიქოშვილს ადმინისტრაციულ შენობაში გააცნეს.

„მათ ძალიან საინტერესო პროექტი წარმოადგინეს, რასაც აუცილებლად მხარს დავუჭერ და უახლოეს სხდომაზევე გავიტან. ეს ტრანსპორტი ერთ ადამიანს კი არა, მთელ ქალაქს ემსახურება და მისი პირობები ნამდვილად უნდა გაუმჯობესდეს“, - ამბობს გიქოშვილი.

ახალგაზრდებმა საქალაქო ტრანსპორტის პირობების გაუმჯობესების შესახებ დადგენილების პროექტი, 20 ივლისს ფრაქცია „ქართული ოცნების“ თავმჯდომარეს მამუკა მიქელაძესაც გააცნეს. როგორც შეხვედრაზე მიქელაძემ განაცხადა, ქალაქის მერიას ამ საკითხზე მუშაობა მანამდე ჰქონდა დაწყებული და თვითმმართველობა თბილისიდან მეორადი ტრანპორტის შემოყვანას გეგმავს.

ამ მოსაზრებას საკრებულოს უმცირესობის წარმომადგენლები ეწინააღმდეგებიან.

„რაც მოძველდება თბილისში და გადასაყრელია, ეს პერიფერიებში არ უნდა გადავიტანოთ, დედაქალაქმა იმ ტრანსპორტს რაც უნდა ის უქნას, ჩვენ ქალაქს სხვანაირად მივხედოთ“, - ამბობს მალხაზ გიქოშვილი და ამატებს – „ უმჯობესი იქნება მერიამ ორი ახალი სატრანსპორტო საშუალება შეიძინოს, ვიდრე გამოუსადეგარი დედაქალაქიდან ჩამოიყვანოს“.

ახალგაზრდების მიერ ადვოკატირების კამპანია, ხორციელდება პროექტ "ნდობის მშენებლობა სამხრეთ კავკასიაში" ფარგლებში, რომელსაც ახორციელებს საქართველოს გაეროს ასოციაცია, შვედეთის გაეროს ასოციაციის ფინანსური მხარდაჭერით. პროექტის პარტნიორი, სამცხე-ჯავახეთში „დემოკრატ მესხთა კავშირია“.

[ლუბა გიორგაძე, ახალციხე]