N2 ვაჟა ჩიტაშვილი – საარჩევნო ბლოკი „ბაქრაძე უგულავა– ევროპული საქართველო“: საქალაქო ტრანსპორტი პრობლემაა, ერთი დადის და ქალაქს წრესაც არ ურტყამს. არის ისეთი უბნები, სადაც, საქალაქო ტრანსპორტი არ მოძრაობს, ეს არის საბარგო სადგურის დასახლება, რაბათი.
საქალაქო ტრანსპორტის მოძრაობას, ბიზნესის თვალით რომ შევხედოთ, არ არის გამართლებული. პირველ ეტაპზე მუნიციპალიტეტმა თანამონაწილეობა უნდა შეძლოს. შეღავათები უნდა დააწესოს სატრანსპორტო საშუალებების ლიცენზიების მქონე პირებისთვის.
უნდა გაიზარდოს დაფინანსება იმ კონდიციამდე, რომ ქალაქის ტრანსპორტმა იმოძრაოს ისეთ უბნებში, სადაც აქამდე არ დადიოდა. ბიუჯეტში ეს გათვალიწინებული უნდა იყოს.
არა მარტო ქალაქზე, მე სოფლებშიც მაქვს იგივე გეგმა. ისეთ სოფლებში, სადაც კვირაში ორჯერ დადის ავტობუსი, აქაც მინდა მუნიციპალიტეტის მერიის როლი გავზარდოთ, ადამიანებს მგზავრობის საშუალება უნდა მივცეთ, ყველას არ აქვს მანქანის ყიდვის საშუალება. ადამიანებს რომ ეცოდინებათ, რომ ყოველდღიურად ავტობუსი დადის, მეტად ივლიან, მომგებიანიც გახდება ეს სფერო და შემდეგ ნელ– ნელა გამოვალთ ამ თანამონაწილეობიდან.
N5 ირაკლი ბარძიმაძე – საარჩევნო ბლოკი „ერთიანი ნაციონალური მოძრაობა“: ჩვენს დაპირებაში გვაქვს ამ საკითხზე საუბარი. არ არსებობს პრობლემა, 25 მილიონიც რომ იყოს, თქვა ამასაც გავაკეთებ და იმასაც. ადამიანი, რომელიც გეუბნება რომ მეოთხე წელს წყალი უფასო გექნება, გატყუებს, იმიტომ რომ წყალს მილი სჭირდება, ამას კი თანხა.
ტყუილია, როდესაც ამბობ, რომ ყველაფრის ბიუჯეტით გააკეთებ. ბიზნესს შევუწყობთ ხელს, რომ ქალაქის პრობლემების მოგვარების საკითხებში ჩავრთოთ, დავაინტერესებთ.
ქალაქის ყველა დასახლებაში უნდა მოძრაობდეს საქალაქო ტრანპორტი, რაბათში, ზარზმელზე, საბარგო დასახლებაში, ხუთსართულიანებში. დადის ერთი ძველი ავტობუსი წრიულზე, ამ ავტობუსს შემოსავალი თუ არ აქვს, ვერ დადის, მძღოლმა თურმე აქეთ უნდა შეიტანოს ქალაქის ბიუჯეტში თანხა.
ნათქვამია: „ ძვირზე იაფი არ არსებობს“, თუ მოვიყვანთ გამართულ და უფრო ტევად ავტობუსს და არა 12–კაციან „მარშუტკას“, ეს პრობლემა აღარ იქნება. ჩვენ ამას შევისყიდით, როგორც მერიამ ნაგვის მანქანები შეიძინა.
N8 ჯუმბერ ინასარიძე – „დავით თარხან მოურავი, ირმა ინაშვილი – საქართველოს პატრიოტთა ალიანსი“: საქალაქო ტრანსპორტი და არამარტო საქალაქო, არამედ სოფლისაც, დღეის მდგომრეობით ვერავითარ კრიტიკას ვერ უძლებს. საქმე ისაა, რომ ქალაქის ცენტრიდან არც ისე შორს მდებარე სოფლებში დღეს თვითმმართველ ქალაქიდან არ დადის ტრანსპორტი.
თუკი ქალაქიდან ივლის დანიშნულების ადგილამდე საჭირო ტრანსპორტი სოფლებში , დღეში ორჯერ მაინც და უკანვე დაბრუნდება, საუკეთესო ხელშეწყობაა დასაქმებულთათვის.
N31 ჯიმშერ გოგოლაური – „თავისუფლება – ზვიად გამსახურდიას გზა“: ქალაქის ბიუჯეტში არის საკმარისი თანხა, რომ შევიძინო ქალაქისთვის ახალი საზოგადოებრივი ტრანსპორტი, რომელიც სტუდენტებს, მოსწავლეებს, ომის ვეტერანებს და შეზღუდული შესაძლებლობების მქონე პირებს უფასოდ მოემსახურება.
N41 ზაზა მელიქიძე – „ქართული ოცნება– დემოკრატიული საქართველო“: მოგეხსენებათ, რომ არის ადგილები, სადაც ტრანსპორტის მოძრაობა ჯერ კიდევ მოუგვარებელია. ქალაქისა და სოფლების მიმართულებით დაინიშნება ახალი სამარშუტო ხაზები. მოეწყობა გაჩერების ადგილები და შეთანხმდება ტრანსპორტის მოძრაობის გრაფიკი. საჭიროების შესაბამისად, იმოძრავებს ტრანსპორტი და ყველანაირად შევეცდები მოსახლეობას აღმოეფხვრას აღნიშნული პრობლემა.
[თინათინ ზაზაძე, ახალციხე]