ტოლოშის სკოლაში აუდიტის სამსახური შევიდა

ასპინძაში სოფელ ტოლოშის საჯარო სკოლაში შიდა აუდიტის დეპარტამენტის წარმომადგენლები მოსწავლე გოგოსთვის საპირფარეშოში მობილურით შესაძლო გადაღების, ასევე მოსწავლეებისთვის ტელეფონების ჩამორთმევისა და გაჩხრეკვის ფაქტებს სწავლობენ. სამინისტროს შიდა აუდიტი ტოლოშის სკოლის საპირფარეშოს ინფრასტრუქტურული მდგომარეობითაც დაინტერესდა.

„გუშინ მივიდნენ სკოლაში და ხვალ დაასრულებენ მოკვლევას. შემდეგ დასკვნას გადმოგვიგზავნიან“, – ამბობს ასპინძის საგანმანართლებლო რესურსცენტრის უფროსი ტრისტან მურადაშვილი.

განათლების სამინისტროში აცხადებენ, რომ ტოლოშის სკოლაში ყველა იმ სავარაუდო დარღვევის ფაქტს მოიკვლევენ, რაზეც ბოლო პერიოდში ინფორმაცია გავრცელდა: „გიდასტურებთ, რომ შიდა აუდიტის დეპარტამენტი ტოლოშის სკოლაში არსებულ ვითარებას სწავლობს“.

შეგახსენებთ, რომ ტოლოშის სკოლაში უფროსკლასელი გოგონა, ასევე, უფროსკლასელ ბიჭს, ადანაშაულებს, რომ მას საპირფარეშოში ჭერთან გამოღებული კედლიდან მობილურით უღებდა. ამის შემდეგ უფროსი კლასების მოსწავლეებს მობილურები ცხრა დღით ჩამოართვეს. ამ ფაქტზე მუშაობის დროს კი „სამხრეთის კარიბჭემ“ დააფიქსირა, რომ სკოლაში მოსწავლეების საპირფარეშოს კარები არ ჰქონდა, მასწვლებლებისას კი კარები ჰქონდა, თუმცა საკეტები არა.

[თამუნა უჩიძე, ასპინძა]