ტოლოშის სკოლაში არსებულ ვითარებას ომბუდსმენის აპარატი სწავლობს

სახალხო დამცველის აპარატმა ტოლოშის სკოლაში, ასევე მუნიციპალიტეტის სკოლების საპირფარეშოებში არსებული მდგომარეობის შესაწვლა „სამხრეთის კარიბჭეში“ გამოქვეყნებული სტატიების საფუძველზე დაიწყო.

როგორც სახალხო დამცველის აპარატის საზოგადოებასთან ურთიერთობის სამსახურში გვიხსნიან, მათ განათლების სამინისტროს წერილობით უკვე მიმართეს: „წერილში სამინისტროს ვწერთ, რომ უნდა შეამოწმონ, იკვეთება თუ არა ბავშვებს შორის რაიმე ფორმის ძალადობის, ბულინგის შემთხვევა, ანუ ფოტოს გადაღება ბულინგის ნაწილია ამ გოგონას მიმართ თუ სხვა შემთხვევასთან გვაქვს საქმე“.

ასევე, სახალხო დამცველის აპარატი სამინისტროს ავალებს მოიკვლიოს რამდენად სწორად მოხდა სკოლის ადმინისტრაციის მხრიდან აღნიშნულზე რეაგირება და დასტურდება თუ არა არასრულწლოვნებისთვის მათ საკუთრებაში არსებული ტელეფონების ცხრა დღით ჩამორთმევის ფაქტი: „დავინტერესდით რა ზომები გაატარეს სკოლაში აღნიშნულთან დაკავშირებით. გარდა ამისა, გვაინტერესებს, შეესაბამება თუ არა სინამდვილეს ბავშვების პერსონალური მონაცემების შემოწმების ფაქტი. ველოდებით პასუხს“.

ვიდრე სამინისტრო სახალხო დამცველის აპარატს პასუხს დაუბრუნებს, ომბუდსმენის წარმომადგენლები ასპინძის მუნიციპალიტეტის სკოლების საპირფარეშოებს შეამოწმებენ: „ადგილზე გადავამოწმებთ ყველა სკოლის საპირფარეშოს ინფრასტრუქტურულ მდგომარეობას“.

შეგახსენებთ, რომ ტოლოშის სკოლაში უფროსკლასელი გოგონა, ასევე, უფროსკლასელ ბიჭს, ადანაშაულებს, რომ მას საპირფარეშოში ჭერთან გამოღებული კედლიდან მობილურით უღებდა. ამის შემდეგ უფროსი კლასების მოსწავლეებს მობილურები ცხრა დღით ჩამოართვეს. ამ ფაქტზე მუშაობის დროს კი „სამხრეთის კარიბჭემ“ დააფიქსირა, რომ სკოლაში მოსწავლეების საპირფარეშოს კარი არ ჰქონდა, მასწავლებლებისას კი კარი ჰქონდა, თუმცა საკეტები არა.

ანალოგიური აღმოჩნდა ვითარება ასპინძის სხვა სოფლების სკოლების საპირფარეშოებშიც.

[თამუნა უჩიძე, ასპინძა]