დელეგაცია ‘ათასწლეულის გამოწვევის ფონდის’ მიერ რეაბილიტირებულ ვალის სკოლაში

ახალციხის პირველი სკოლის საზეიმოდ გახსნის შემდეგ, დელეგაციამ ვალეში გადაინაცვლა, სადაც სკოლა, ასევე, „ათასწლეულის გამოწვევის ფონდის“ დაფინანსებით გარემონტდა.

პროექტის ფარგლებში სკოლა სრულად გარემონტდა და აღიჭურვა.

ვალის სკოლას ახლა უკვე აქვს, Steam ლაბორატორია, რომელიც მოსწავლეებს ქიმიის, ბიოლოგიის, გეოგრაფიასა და მათემატიკის საგნების უკეთ სწავლაში ეხმარება. სკოლაში განახლდა ქიმიის კაბინეტი, კომპიუტერის ოთახი, რომელსაც ათი ახალი პერსონალური კომპიუტერი შეემატა, ბიბლიოთეკა, სპორტული დარბაზი და სასადილო. გარდა ამისა სკოლაში მოეწყო და შემოიღობა ეზო და დამონტაჟდა პანდუსები.

სკოლის დირექტორის ირა გიორგაძის განმარტებით, სკოლაში დაცულია უსაფრთხოების ზომები: „შენობაზე მეხამრიდი დამონტაჟდა. გარდა ამისა, აღჭურვილები ვართ ხანძარსაწინააღმდეგო ბალონებით. სკოლას შეუძლია შვიდბალიან მიწისძვრას გაუძლოს“.

მისივე თქმით, სკოლა 1953 წელს გაიხსნა, თუმცა კაპიტალური რემონტი არ ჩასტარებია. ამჟამად სკოლაში 299 მოსწავლე სწავლობს.











[ლუბა გიორგაძე, ახალციხე]