სოფელ კარტიკამში რეაბილიტირებული სკოლა გაიხსნა

განახლებული სკოლა ათასწლეულის გამოწვევის ფონდის საქართველოს აღმასრულებელმა დირექტორმა მაგდა მაღრაძემ, ამერიკის ელჩის მოვალეობის შემსრულებელმა ელიზაბეთ რუდმა, განათლებისა და მეცნიერების მინისტრის მოადგილემ თეიმურაზ მურღულიამ, სამცხე-ჯავახეთის გუბერნატორმა კახა სამხარაძემ და ნინოწმინდა-ახალქალაქის მაჟორიტარმა დეპუტატმა ენზელ მკოიანმა საზეიმოდ გახსნეს. ღონისძიებას ახალქალაქის ადგილობრივი თვითმმართველობის წარმომადგენლები და სოფელ კარტიკამის მაცხოვრებლები ესწრებოდნენ.

სრული რეაბილიტაცია ჩაუტარდა სკოლის სამსართულიან შენობას, მოწესრიგდა საკლასო ოთახები და სპორტული დარბაზები, ასევე, გათბობისა და წყალსაკანალიზაციო სისტემები. სკოლა აღიჭურვა საბუნებისმეტყველო ლაბორატორიებითა და შესაბამისი სასკოლო ინვენტარით.

ათასწლეულის განვითარების ფონდის მიერ ამ ეტაპისთვის სამცხე-ჯავახეთის რეგიონში ექვსი საჯარო სკოლაა გარემონტებული.

ფონდის მიერ ჯამში, 2016-2017 წლებში სრული რეაბილიტაცია ჩაუტარდა და საბუნებისმეტყველო ლაბორატორიებით აღიჭურვა 30 საჯარო სკოლა მცხეთა-მთიანეთის, შიდა ქართლის, სამცხე-ჯავახეთისა და რაჭა-ლეჩხუმის რეგიონებში. მოწესრიგდა 70 000 კვადრატული მეტრი ფართი და სასწავლო გარემო 10 000-ზე მეტი მოსწავლისთვის გაუმჯობესდა. ამ ეტაპზე, პარალელურად მიმდინარეობს 30 საჯარო სკოლის რეაბილიტაცია კახეთის, ქვემო ქართლისა და სამცხე-ჯავახეთის რეგიონებში. შედეგად სასწავლო გარემო, დამატებით 13 000 მოსწავლისთვის გაუმჯობესდება.



[sknews.ge]