ვაჟა აზარაშვილისთვის ახალციხეში ვარსკვლავის გახსნას გეგმავდნენ

30 ივნისს ”ახალციხელობის” დღესასწაული აღინიშნება. ამ დღესთან დაკავშირებით სხვადასხვა ღონისძიებებია დაგეგმილი. ადგილობრივი თვითმმართველობის წარმომადგენლები კომპოზიტორ ვაჟა აზარაშვილისათვის საპატიო მოქალაქის წოდების მინიჭებას გეგმავენ. საკრებულოში ამ ფაქტს იმით ხსნიან, რომ კომპოზიტორი წარმოშობით ახალციხიდანაა.

”ჩვენი სურვილი იყო, რომ ახალციხის ციხის ტერიტორიაზე ვაჟა აზარაშვილის ვარსკვლავი გაგვეხსნა. აღმოჩნდა, რომ მისი ვარსკვლავი უკვე არსებობს, ამიტომ გადავწყვიტეთ, რომ მისთვის და კიდევ რამდენიმე პიროვნებისთვის საპატიო მოქალაქის სტატუსი მიგვენიჭებინა”, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

ადგილობრივმა თვითმმართველობამ ”ახალციხელობის” დღესასწაულთან დაკავშირებით მზადება უკვე დაიწყო.

”მოვიწვიეთ სპეციალისტი, რომელსაც ამ კუთხით მუშაობის უდიდესი გამოცდილება აქვს და ვთხოვეთ, რომ გაგვარკვიოს საორგანიზაციო საკითხებში. დღეს იყვნენ ჩვენთან სტუმრად და ამ საკითხზე მუშაობა უკვე დავიწყეთ”, - განმარტავს ოლეგ სანდროშვილი.

[თამარ თოთაძე, ახალციხე]