'საპატიო მოქალაქეების' წარდგენა იდეის ავტორის გარეშე

30 ივნისს ახალციხეში სახელობითი დღესასწაული იზეიმეს. ახალციხის ციხის ამფითეატრში მიმდინარე საზეიმო კონცერტს სასულიერო პირები, სამხარეო ადმინისტრაციისა და ადგილობრივი ხელისუფლების წარმომადგენლები ესწრებოდნენ, თუმცა, მათ შორის არ იყო ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

ოლეგ სანდროშვილი ახალციხის ციხეში არც მაშინ გამოჩენილა, როცა "ახალციხის სამი საპატიო მოქალაქე" აირჩიეს. ოლეგ სანდროშვილის სახელი, რომლის ინიციატივითაც, გასულ წელს, „ახალციხელობას“ "საპატიო მოქალაქეების" არჩევის ტრადიცია დამკვირდა, დაჯილდოებაზე არც უხსენებიათ. მომხდარის გამო საკრებულოს თავმჯდომარემ გულისტკივილი „სამხრეთის კარიბჭეს“ სტატიებზე, კომენტარებით გამოხატა.


"ახალციხელობა 2013", ოლეგ სანდროშვილი აჯილდოებს საპატიო მოქალაქეებს

რატომ არ ესწრებოდა დღესასწაულს, ამ კითხვით „სამხრეთის კარიბჭემ“ ოლეგ სანდროშვილს დღეს, ღონისძიებებიდან მეორე დღეს მიმართა.

იგი ამბობს, რომ „ახალციხელობისადმი“ მიძღვნილი ღონისძიებები მისი ინიციატივით დაიგეგმა, მან აღადგინა წლების წინ მივიწყებული "საპატიო მოქალაქეობის" სტატუსის მინიჭებისა და ვარსკვლავის გახსნის ტრადიციაც, თუმცა აღნიშნულ ღონისძიებებზე დასწრების სურვილი არ გასჩენია.

„რაღაც მიზეზების და ვიღაცეების გამო არ მინდოდა გუშინდელ ღონისძიებას დავსწრებოდი. თუმცა, როგორც ახალციხის საპატიო მოქალაქის წოდება, ასევე ვარსკვლავის გახსნა, ჩემი იდეა იყო. კონკრეტულად, "საპატიო მოქალაქის" წოდების მინიჭების ტრადიცია ჯერ კიდევ გასულ წელს დავამკვიდრე, თუმცა ახლა სხვები იწერენ ქულებს“,– განაცხადა სანდროშვილმა.

კითხვაზე, ვინ არიან ისინი, ვის გვერდით დგომაც არ სურდა, სანდროშვილმა განაცხადა რომ მათში ხელისუფლების ამჟამინდელ წევრებს გულისხმობს.

შეგახსენებთ, გასულ, 2013 წელს, "ახალციხელობას" "საპატიო მოქალაქეების" წოდება კომპოზიტორ ვაჟა აზარაშვილს, გიტარისტ თემურ ყვითელაშვილსა და რეჟისორ თემურ ჩხეიძეს მიენიჭათ. ჯილდოები მათ ოლეგ სანდროშვილმა გადასცა.

[მანანა სარაშვილი, ახალციხე]