საპატიო მოქალაქეები: სტატუსი მოულოდნელი იყო

საპატიო მოქალაქეები „ახალციხის ციხის“ ტერიტორიაზე, შალვა ახალციხელის ხსენების დღისადმი გამართულ კონცერტზე, ქალაქის მერმა ვლადიმერ ზედგინიძემ დაასახელა და მათ სიგელები, საპატიო მოქალაქის ორდენები და სიმბოლური საჩუქრები გადასცა.

ინგლისის ქალაქ ნიუკასლის საკრებულოს ყოფილი თავმჯდომარე დევიდ ფოლკნერი ამბობს, რომ ახალციხეში ჩამოსვლამდე არ იცოდა, რომ ქალაქის საპატიო მოქალაქედ ირჩევდნენ: „რომ ჩამოვედი პირადი მონაცემები მომთხოვეს, როცა ვიკითხე რისთვის სჭირდებოდათ, მითხრეს რომ საპატიო მოქალაქედ მირჩევდნენ, ეს ჩემთვის ნამდვილი სიურპრიზი იყო. ეს კიდევ ერთი სტიმულია, რომ გაღრმავდეს ჩვენი ურთიერთობა და ვიზრუნო ამ ქალაქზე“.

იცოდა, რომ საპატიო ახალციხელობის კანდიდატთა სიაში იყო, თუმცა არჩევას არ ელოდა მძლეოსნობის ფედერაციის პრეზიდენტი ზიგმუნდ ზილბერშტეინი: „ეს, რა თქმა უნდა, ჩემთვის დიდი პატივია. ამავე დროს, იყო ახალციხის საპატიო მოქალაქე, პასუხისმგებლობაა".

ახალციხის სამუსიკო სკოლის დირექტორი ცისანა ახვლედიანი საპატიო ახალციხელთა კანდიდატების სიაში წინა წლებშიც იყო:„ჩემთვის ეს არის უდიდესი ბედნიერება. ნამდვილად არ ველოდებოდი ჯილდოს. ეს ჩემთვის ყველაზე დიდი სტატუსია, რაც კი შეიძლება მომნიჭებოდა“.

წელს საპატიო მოქალაქეები ახალციხემ გასულ წლებისგან განსხვავებულად აირჩია. ქალაქის საკრებულოს ახალი დადგენილების მიხედვით, ჩამოყალიბდა საპატიო ახალციხელების შესარჩევი სპეციალური კომისია, რომელიც 20 წევრისგან დშედგებოდა. საპატიო ახალციხელები კი, ფარული კენჭისყრით, 10 კანდიდატიდან შეარჩიეს.

საპატიო ახალციხელების გამოვლენის შემდეგ, ახალციხის ციხეზე, ახალციხელობის აღნიშვნა კონცერტით გაგრძელდა. კონცერტში ადგილობრივი ცეკვისა და სიმღერის ანსამბლები, ასევე, ახალციხის საპატიო მოქალაქეები ვაჟა აზარაშვილი და თემურ ყვითელაშვილი მონაწილეობენ.

ახალციხელობისადმი მიძღვნილი ღონისძიებები ფოიერვერკით დასრულდება.

[ლუბა გიორგაძე, ახალციხე]