„ახალციხელობის“ დღესასწაულზე დაგეგმილი ღონისძიებები

„ახალციხელობის“ აღნიშვნა დღის 09:00 საათიდან დაიწყება და წმინდა შალვა ახალციხელისადმი მიძღვნილი პარაკლისით გაიხსნება. პარაკლისის დასრულების შემდეგ ახალციხისა და ტაო-კლარჯეთის მიტროპოლიტი მეუფე თეოდორე მის მიერ მოწვეული სტუმრებისთვის ტრაპეზს გამართავს, მოგვიანებით კი საფარის ან ზარზმის მონასტრის კომპლექსის დასათვალიერებლად წაიყვანს.

დღის მეორე ნახევარში საზეიმო ცერემონიალებია დაგეგმილი. 18:00 საათიდან მეუფე თეოდორე, ახალციხის მუნიციპალიტეტის საკრებულოს თავმჯდომარე ოლეგ სანდროშვილი და ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე სიტყვით გამოვლენ. ამის შემდეგ ადგილობრივი ქორეოგრაფიული და ფოლკლორული ანსამბლების, მესხეთის დრამატული თეატრისა და ახალგაზრდა მომღერლის სოფო პაპუაშვილის მონაწილეობით ღონისძიება გაიმართება.

ამავე დღეს არის დაგეგმილი მესხეთის საერთაშორისო საფეხბურთო ფესტივალში მონაწილე გუნდებისა და ფეხბურთელების დაჯილდოება. ამის შემდეგ გიტარისტ თემურ ყვითელაშვილს, რეჟისორ თემურ ჩხეიძესა და კომპოზიტორ ვაჟა აზარაშვილს საპატიო „ახალციხელის წოდება“ მიენიჭებათ.

საზეიმო ცერემონიალის მეორე ნაწილზე კომპოზიტორ ვაჟა აზარაშვილის შემოქმედებითი საღამო გაიმართება. საღამოზე ქართული ესტრადის 20 წარმომადგენელი ვაჟა აზარაშვილის რეპერტუარიდან შეასრულებს სიმღერებს. ღონისძიებები ფეიერვერკით დასრულდება.

[ნინო ზედგინიძე, ახალციხე]