სამცხე–ჯავახეთში არჩევნებზე 18 საჩივარი დაიწერა

დღეს, 24 ოქტომბერს, 18:00 საათზე, საჩივრების მიღების ვადა იწურება. სამცხე–ჯავახეთის საოლქო კომისიების ნაწილმა საჩივრების მიღება და განხილვა უკვე დაასრულა. ნაწილი კი განხილვაზე დღეს და ხვალ იმუშავებს.

საერთო ჯამში დაწერილი 18 საჩივრიდან ყველაზე მეტი, 8 საჩივარი ახალციხის საოლქოში შევიდა, ახალქალაქსა და ასპინძაში 4–4 საჩივარი დაიწერა, ადიგენსა და ბორჯომში კი თითო–თითო საჩივარი დარეგსიტრირდა. რაც შეეხება ნინოწმინდას, აქ საჩივარი არ დაწერილა.

ახალქალაქის საოლქო კომისიაში აცხადებენ, რომ საჩივრებს ხვალ განიხილავენ. ადიგენის საოლქო კომისიაში კი ვარაუდობენ, რომ საჩივარს განუხილველს დატოვებენ, რადგან მისი დაწერის ვადებია დარღვეული. ასევე განუხილველი დატოვა საჩივარი ბორჯომმაც.

უკვე განიხილა ოთხივე საჩივარი N39 ასპინძის საოლქო საარჩევნო კომისიამ. აქედან ორი არ დაკმაყოფილდა, ორზე კი საუბნო კომისიის წევრების ადმინისტრაციული პასუხისმგებლობის საკითხი დადგა.

ასპინძაში ორი დაკმაყოფილებული საჩივრიდან ერთი N4 დამალის, მეორე კი N9 ნაქალაქევის საარჩევნო უბნებს ეხებოდათ. ორივე საჩივარი საიამ დაწერა. დამალაში შემაჯამებელ ოქმს ერთ–ერთი კომისიის წევრის ხელმოწერა აკლდა და მას ამის გამო ხელფასი დაუკავდება. ნაქალაქევში კი უბნის თავმჯდომარესა და მდივანს შენიშვნა მისცეს.

ასპინძის მსგავსად, დაარსულა საჩივრების განხილვა ახალციხის საოლქო კომისიამაც. რვა საჩივრიდან აქ მხოლოდ ერთი დაკმაყოფილდა. საჩივარი N19 საძელის საარჩევნო უბანს ეხებოდა. აქ ერთი და იგივე პირი უბანზე შესვლას რამდენჯერმე ცდილობდა. ამიტომ საუბნო კომისიის თავმჯდომარესა და მდივანს გაფრთხილება მიეცა.

[თამუნა უჩიძე, ახალციხე]