წინასწარ ბეჭედდარტყმული ბიულეტენისთვის ახალქალაქში რეგისტრატორს შენიშვნა მისცეს

ახალქალაქში N20 პატარა სამსარის უბანზე „ახალგაზრდა იურისტთა ასოციაციის“ წარმომადგენელმა ნონა ასკილაშვილმა რეგისტრატორს ნორაერ ხაჩატურიანს საჩივარი დაუწერა. საჩივრის მიხედვით, ხაჩატურიანს ბეჭედდარტყმული და ხელმოწერილი ბიულეტენი წინასწარ ჰქონდა გამზადებული. მას ახალქალაქის საოლქო კომისიამ შენიშვნა მისცა.

ასკილაშვილმა ამავე უბანზე კიდევ ერთ საჩივარი დაწერა. საიას წარმომადგენელი ირწმუნება, რომ N20 საუბნო კომისიის თავმჯდომარე და მდივანი ალკოჰოლური სასმელის თრობის ქვეშ იმყოფებოდნენ. საოლქო კომისიამ ეს საჩივარი არ დააკმაყოფილა.

ახალქალაქში N73 N21 N28 საარჩევნო უბანზე ასკილაშვილის მიერ დაწერილი საჩივრების მიხედვით, კომისიის თითო–თითო წევრმა შემაჯამებელ ოქმებს ხელი არ მოაწერა. კომისიების იმ წევრებს, რომლების ხელმოწერაც აკლდა ოქმებს, შენიშვნები მისცეს.

ასევე, ასკილაშვილმა დაწერა საჩივარი N69 კუმურდოს უბანზე. მისი თქმით, აქ უბანი დაგვიანებთ გაიხსნა. კომისიამ აღნიშნული საჩივარი არ დააკმაყოფილა. ამავე უბანზე საჩივარი დაწერა „სამოქალაქო განვითარების საერთაშორისო ქსელის“ წარმომადგენელმა შმაგი ჩოხელმაც. მისი განცხადების მიხედვით, ამომრჩეველმა ბიულეტენი რეგისტრატორის მაგიდაზევე შემოხაზა. კომისიამ დარღვევად არც ეს შემთხვევა მიიჩნია.

„დემოკრატ კონსერვატორების“ წარმომადგენლის არტურ მკოიანის მიერ N63 ხოსპიოს უბანზე დაწერილი საჩივრის მიხედვით, კენჭისყრის ოთახში გაშლილი სუფრის გამო, საარჩევნო პროცედურები შეფერხდა. აღნიშნული არ დადასტურდა კომისიის წევრების მიერ წარმოდგენილი ახსნა–განმარტებებით, რის გამოც კომისიამ მკოიანის საჩივარი არ დააკმაყოფილა.

ასევე, არ დაკმაყოფილდა ახალქალაქში N49 და N41 ფილიპოვკას უბნებზე დაწერილი საჩივრები. N41 უბანზე დაწერილი საჩივრის მიხედვით შემაჯამებლ ოქმში თარიღი და დრო არ იყო მითითებული, ხოლო N49 უბანზე უბნის გახსნის დროს ყუთში არ ჩააგდეს საკონტროლო ფურცელი.

ახალქალაქის საოლქო კომისიას განსახილველი ოთხი საჩივარი დარჩა. ოლქში ამბობენ, რომ მათ უახლოეს დღეებში განიხილავენ.

[მარიამ ბარძიმაძე, ახალქალაქი]