ახალქალაქის საოლქო კომისიამ ათი საჩივრიდან შვიდი განიხილა

საჩივრებს ახალქალაქის საოლქო საარჩევნო კომისია, დაახლოებით, ნახევარი საათის განმავლობაში იხილავდა. მათი დიდი ნაწილი „მრავალეროვანი საქართველოს“ წარმომადგენელმა ერნა პოღოსოვამ დაწერა. საჩივრების ნაწილის ხელს კი "დემოკრატ კონსერვატორების" წარმომადგენლი არტურ მკოიანი აწერდა.

მკოიანი, N46 ბეჟანოს უბანზე წერდა, რომ მოქალაქეები ხმას პირადობის გარეშე აძლევდნენ, ამას კი საუბნო საარჩევნო კომისიის წევრი გოჩა ტალახაძე ტელეფონით იღებდა. ამაზე საუბნო კომისიის თავმჯდომარე გაღიზიანდა და ტალახაძეს ტელეფონი დაუმტვრია. აღნიშნულ საკითხებზე, ბეჟანოს უბნის თავმჯდომარეს განმარტება ჰქონდა წარმოდგენილი, სადაც წერდა, რომ ტალახაძე სამაგიდო სიების გადაღებას ცდილობდა, ამისი უფლება კი არ ჰქონდა. ახალქალაქის საოლქო კომისიამ საუბნო კომისიის თავმჯდომარის პოზიცია გაიზიარა და მკოიანის საჩივარი არ დააკმაყოფილა.

N27 უბანზე საჩივარი ერნა პოღოსოვამ დაწერა. საჩივრის მიხედვით უბანზე კომისიის წევრებს სუფრა ჰქონდათ გაშლილი და ალკოჰოლური სასმელები ელაგათ. ამავე უბნის თავმჯდომარის განმარტებითი ბარათში ეწერა, რომ აღნიშნული ბოთლები არა უბანში არამედ სხვა ოთახში იყო, ამიტომ ახალქალაქის საოლქო კომისიამ ერნა პოღოსოვას მოთხოვნა, დისპილინური სახდელი დაკისრებოდა უბნის თავმჯდომარეს, არ დააკმაყოფილა.

N49 კუმურდოს უბანზე პირადობის გარეშე ხმის მიცემას ეხებოდა, ასევე, პოღოსოვას საჩივარი. აქაც უბნის თავმჯდომარე განმარტებით ბარათში წერდა, რომ ეს სიმართლეს არ შეესაბამებოდა, მისი თქმით, უბანზე მხოლოდ ორი კაცი მივიდა პირადობის გარეშე და ორივე მათგანი უკან გააბრუნა. საოლქო კომისიამ ამჯერადაც უბნის თავმჯდომარის პოზიცია გაიზიარა და პოღოსოვას საჩივარი არ დააკმაყოფილა.

N13 უბანზე დაწერილი საჩირვის მიხედვით, შემაჯამებელ ოქმში ციფრია შესწორებული. ამჯერადაც პოღოსოვა თავმჯდომარისა და მდივნისთვის დისციპლინური სახდელის დაკისრებას ითხოვდა. თუმცა, ახალქალაქის საოლქო კომისია უბნის თავმჯდომარის ახსნა–განარტებას დაეყრდნო, რომელშიც ეწერა, რომ შეცდომა დაღლილობის გამო გაეპარათ, ამიტომ საჩივარი არ დააკმაყოფილა.

კომისიამ დღევანდელ სხდომაზე მხოლოდ სამი საჩივარი დააკმაყოფილა. მათ შორის ერთ–ერთი N11 საარჩევნო უბანს ეხებოდა. აქ ნაკადის მომწესრიგებელმა 10 წუთით ოთახი დატოვა. ამის გამო მას შენიშვნა მისცეს.

N37 ხულგუმოს უბანზე კომისიის წევრმა უარი განაცხადა წილისყრის პროცედურებში მონაწილეობის მიღებაზე. საოლქო კომისიამ მას შენიშვნა გამოუცხადა.

ასევე შენიშვნით შემოიფარგლა N1 უბანზე კომისიის წევრის მიმართ კომისია, რომელმაც უბანზე ფუნქციების განაწილებისას წილისყრაში მონაწილეობაზე უარი თქვა.

კომისიამ საოლქოში შესული ერთ–ერთი საჩივარი განუხილველი დაოტვა და განაცხადა, რომ ის არაუფლებამოსიი პირის მიერ იყო შედგენილი. სამი საჩივარის განხილვა კი გადადო.



[მარიამ ბარძიმაძე, ახალქალაქი]