სამცხე–ჯავახეთის საარჩევნო ოლქებში 33 საჩივარი დაიწერა

ახალქალაქის ოლქში 14 საჩივრიდან შვიდი „მრავალეროვანმა საქართველომ“, ორი „სამართლიანმა არჩევნებმა“, ორი „ნაციონალურმა მოძრაობამ“, ორი კი საარჩევნო სუბიექტის წარმომადგენელმა დაწერა. მათი საჩივრების ნაწილი შემაჯამებელ ოქმებს, ასევე, ხმის მიცემისა და წილისყრის პროცედურების დარღვევას ეხება.

ახალციხის საოლქოში საჩივრები დაიწერა შემაჯამებელი ოქმების არასწორად შევსებაზე, სააგიტაციო მასალის დარღვევით განთავსებაზე და სხვა პროცედურულ დარღვევებზე. აქ სამი საჩივარი „ნაციონალურმა მოძრაობამ“, ოთხი „სამართლიანმა არჩევნებმა“, ერთით „ახალგაზრდა იურისტთა ასოციაციამ“ და ერთი საინფორმაციო სააგენტო „ნიუსფეისმა“ დაწერა.

ბორჯომის საარჩევნო ოლქში დაწერილი საჩივრებიდან ექვსი შემაჯამებელ ოქმებს და ორი აგიტაციას ეხება. ოლქს სამი საჩივარი „სამართიანმა არჩვნებმა“, ორი „ნაციონალურმა მოძრაობამ“, ორი „ახალგაზრდა იურისტთა ასოციაციამ“ და ერთი „ლეიბორიტულმა“ პარტიამ დაუწერა.

ნინოწმინდაში ორი საჩივარი „მრავალეროვანმა საქართველომ“ შეიტანა. ისინი კენჭისყრის, ასევე, წილისყრის პროცედურების გადანაწილებისას პროცედურულ დარღვევებს ეხება.

ასპინძის საარჩევნო ოლქში ამდრომდე არცერთი საჩივარი დაწერილა.

რაც შეეხება ადიგენს, საოლქო კომისიის თავმჯდომარე ამბობს, რომ „რამდენიმე უბანზე იყო ხარვეზები, თუმცა ადგილზევე აღმოიფხვრა და საჩივარი აღარ დაწერილა“.

საარჩევნო კომისიებს საჩივრების განხილვისთვის ორდღიანი ვადა აქვთ.

[ლუბა გიორგაძე, ახალციხე]