გაფრთხილებები და ჯარიმები – საოლქო კომისიამ საჩივრები განიხილა

N37–ე ახალციხის საოლქო საარჩევნო კომისიაში 27 განცხადება/საჩივარი შევიდა, აქედან 8 უბნებიდან ამოღებული საჩივრებია. საჩივრებს შორის იყო არჩევნებამდე შესული განცხადებაც, მაგალითად, საჩივარი იმის შესახებ, რომ N15 ელიაწმინდის საუბნო საარჩევნო კომისიის თავმჯდომარემ ბიულეტენები სახლში წაიღო. „რაც არ დადასტურდა“, – გვიხსნის N37–ე ახალციხის საოლქო საარჩევნო კომისიის თავმჯდომარე თეა გავაშელი.

მისივე თქმით, საჩივრების უმეტესობა უბნებზე მიღებული ბიულეტენების ნაკლები რაოდენობის გამო დაიწერა.

„ეს ჩანაწერთა წიგნში ჰქონდათ აღნიშნული. პარალელურ რეჟიმში საჩივრები შემოდიოდა ჩვენთან, მაგრამ ფაქტობრივად, გაორებული საჩივრები იყო. ერთ-ერთი საჩივარი ეხებოდა იმას, რომ სუბიექტის წარმომადგენელს ჰქონდა დამკვირვებლის სტატუსი, აღნიშნულის შესახებ ეცნობა ცესკოს და გაუუქმდა დამკვირვებლის სტატუსი, შესაბამისად, შეეზღუდა უბნებზე შესვლის უფლება“, – განმარტავს გავაშელი.
N37–ე ახალციხის საოლქო საარჩევნო კომისიაში, კენჭისყრის მეორე დღეს, 16 ივნისს, საჩივრები შემაჯამებელ ოქმებთან დაკავშირებით შევიდა. ჯამში 12 საჩივარი. აქედან ერთ-ერთი ფერსის საარჩევნო უბნიდან. ფერსის უბანზე საჩივარი „ქართული ოცნების“ წარმომადგენელმა დაწერა.

„აღნიშნული პიროვნება განმარტავდა, რომ უბანზე „ერთიანი ნაციონალური მოძრაობის“ აქტივისტები და წევრები იყვნენ, რამაც ზეგავლენა მოახდინა კომისიაზე და ხმის დათვლის დროს კომისია დაიბნა. ითხოვდა ხმების ხელახლა გადათვლას. თუმცა, აღნიშნულ განცხადება–საჩივარს გასული ჰქონდა ხანდაზმულობის ვადა და ამიტომ უარი ეთქვა“, – ამბობს გავაშელი.

მისივე თქმით, რაც შეეხება დანარჩენ საჩივრებს შემაჯამებელი ოქმის დარღვევასთან დაკავშირებით, თითქმის ერთი და იგივე სახის დარღვევები იყო და ეხებოდა არჩევნებში მონაწილე ამომრჩეველთა რაოდენობას: „წელს იყო განსხვავებული არჩევნები, განსხვავებული სპეციფიკით აძლევდნენ ხმას სპეციალური სიის ამომრჩევლები, ვინაიდან ზოგი სარგებლობდა 1, 2 და 3 ბიულეტინით, კომისიამ ვერ განსაზღვრა, რომ ის იყო ერთი ამომრჩეველი და ცალ–ცალკე ბიულეტენებზე არ უნდა გაეკეთებინათ აქცენტი. ამის გამო ჩაწერეს შეცდომით. კომისიამ იმსჯელა და კომისიის რამდენიმე თავმჯომარეს და მდივანს გაფრთხილება მიეცა, რამდენიმეს კი ადმინისტრაციული ჯარიმები დააკისრა“.

გაფრთხილება მიეცათ N2, N10, N20, N25, N27, N28, N29 და N30 საარჩევნო უბნების თავმჯომარეებსა და მდივნებს. N10 საარჩევნო უბნის თავმჯდომარეს და მდივანს 5 დღის ხელფასი დაუკავდება. ასევე 5 დღის ხელფასი დაუკავდება N32 საარჩევნო უბნის თავმჯდომარეს, მდივანმა კი გაფრთხილება მიიღო. გაფრთხილება მიეცა N3 უბნის მდივანსაც, რადგან ოქმში ის გრაფა იყო გამოტოვებული, რომელშიც მიღებული ბიულეტენების რაოდენობა უნდა ჩაეწერათ.

“N3 უბანზე ეს არანაირ გავლენას არ ახდენდა შედეგებზე, მაგრამ, მდივანი უნდა ყოფილიყო უფრო ყურადღებით. ამიტომ მან მიიღო შენიშვნა“, – განმარტავს თეა გავაშელი.

[თინათინ ზაზაძე, ახალციხე]