ასპინძის მერმა მოადგილეები დანიშნა

ასპინძის მუნიციპალიტეტის მერის მოადგილეები დღეს, 24 ნოემბერს დაინიშნენ. როსტომ მაგრაქველიძის პირველი მოადგილე დავით პაპაშვილი, მეორე კი ლევან ბერიძე იქნება.

დავით პაპაშვილს 2017 წლის ოქტომბრამდე ასპინძის მუნიციპალიტეტის გამგეობის ეკონომიკის განვითარებისა და ქონების მართვის სამსახურის უფროსის თანამდებობა ეკავა.

იგი ერთ–ერთი იყო იმ 7 თანამშრომელს შორის, რომელმაც ასპინძის გამგეობა თვითმმართველობის არჩევნებამდე რამდენიმე დღით ადრე დატოვა. პაპაშვილმა სამსახურიდან წასვლის შესახებ, ისევე როგორც დანარჩენმა ხუთმა თანამშრომელმა, განცხადება მაშინ დაწერა, როცა შვებულებაში იყო. მაშინ პაპაშვილს კითხვაზე პასუხი, თუ რატომ ტოვებდა სამსახურს, არ ჰქონდა: „გამგეობაში, ადმინისტრაციის სამსახურში იკითხეთ და გეტყვიან“, – გვითხრა მან.

მაშინდელი გამგებელი ლევან ცაბაძე, რომელიც როსტომ მაგრაქველიძის კონკურენტი იყო და მერის პოზიციაზე დამოუკიდებელ კანდიდატად იყრიდა კენჭს, ირწმუნებოდა, რომ თანამშრომლებს სამსახურს სუს–ი ზეწოლით ატოვებინებდა, მიზეზი კი ის იყო, რომ „ოცნების“ კანდიდატის მხარდამჭერებს სურდათ შეექმნათ სურათი, თითქოს ცაბაძეს ხალხი სამსახურიდან გაურბოდა.

რაც შეეხება ახლად დანიშნულ მეორე მოადგილეს, როსტომ მაგრაქველიძის თქმით, ლევან ბერიძეს თვითმმართველობაში, ასევე საჯარო უსწყებებში მუშაობის დიდი გამოცდილება აქვს: „სხვადასხვა დროს იგი მუშობდა ასპინძის გამგეობაში, პრობაციის სამსახურში, დაცვის პოლიციაში. ბოლოს კი კერძო კომპანიის „ახალი მესხეთის“ მენეჯერი იყო“.

გარდა ამ ადგილეებისა, ასპინძის მერიაში ამ დრომდე სხვა არავინ დანიშნულა.

„რეორგანიზაცია მიმდინარეობს. სულ 10 სამსახური გვექნება. ვაკანტურ პოზიციებზე ვაკანსიას ახალწალმდე გამოვაცხადებთ“.

[თამუნა უჩიძე, ასპინძა]