ასპინძის გამგებლის ყოფილი მოადგილე საოლქო კომისიის წევრიც აღარაა

ასპინძის მუნიციპალიტეტის გამგებლის და დამოუკიდებელი მერობის კანდიდატის ლევან ცაბაძის საინიციატივო ჯგუფის წარმომადგენელი N39 ასპინძის საოლქო საარჩევნო კომისიაში ალექსანდრე პაპაშვილი იყო. მას 11 ოქტომბრამდე ასპინძის მუნიციპალიტეტის გამგებლის მოადგილის პოზიციაც ეკავა. თუმცა, მას შემდეგ რაც მან გამგეობა დატოვა, საინიციატივო ჯგუფმა საოლქო კომისიას მიმართა, რომ მათი წარმომადგენელი თეიმურაზ ბერიძით ჩაანაცვლონ.

„გუშინ შემოვიდა განცხადება, მდივანი მუშაობს ამ საკითხზე. პაპაშვილი ბერიძით ჩანაცვლდება“, – ამბობს N39 ასპინძის საოლქო საარჩევნო კომისიის თავმჯდომარე ნიკოლოზ ლოლაძე.

რატომ გახდა გამგებლის მოადგილის პოზიციის დათმობა საილქო კომისიიდან წამოსვლის მიზეზიც, ამის გარკვევა ალექსანდრე პაპაშვილთან ვერ შევძელით, მისი მობილური ტელეფონი გამორთულია. ცაბაძე კი აცხადებს, რომ მაში,ნ როცა პაპაშვილმა გათავისუფლების შესახებ ბრძანება დაწერა, ძალიან შეშინებული და დაბნეული იყო. გამგებელი ამბობს, რომ მასზე ზეწოლა განხორციელდა.

[თამუნა უჩიძე, ასპინძა]