დანიელაშვილის ქუჩაზე მცხოვრებ 50-მდე ოჯახს საფრთხე ემუქრება

აღნიშნულ დასახლებაში ორი ორსართულიანი საცხოვრებელი კორპუსი და რამდენიმე საკუთარი სახლი დგას. პრობლემის მოგვარებას 50-მდე ოჯახი ითხოვს. მოსახლეობა ამბობს, რომ ალვის ხეებს ტოტები რამდენჯერმე მოტყდა, რომელმაც სათავსოები დაამტვრია, დასახმარებლად კი არავინ მოსულა

- ”შარშან ხეს მოზრდილი ტოტი მოტყდა, სამი სათავსო დაანგრია და საცხოვრებელი კორპუსიც დააზიანა”, - ამბობს დანიელაშვილის ქუჩაზე მცხოვრები რომან გოგოლაური.

ამავე ქუჩაზე მცხოვრები გრიგოლ ფერაძე ამბობს, რომ გასულ წელს ახალციხის მუნიციპალიტეტის გამგეობამ სპეციალური ჯგუფი და ამწე მხოლოდ ერთი დღით გამოყო, რომელმაც რამდენიმე ტოტის მოჭრა მოასწრო.

- ”ჩვენ მარტო ამწეს ვითხოვთ, არც ხელსაწყოები გვინდა და არც მუშა ხელი, ბედი ჩვენი, რომ ძლიერი ქარის დროს ხეს ფოთლები არ ჰქონდა, თორემ დავიღუპებოდით”, - ამბობს გრიგოლ ფერაძე.

როგორც დანიელაშვილის ქუჩის მოსახლეობა ამბობს, წელს არავისთვის მიუმართავთ. თუმცა გასულ წელს მუნიციპალიტეტის გამგეობას მიმართეს და დახმარებას დაჰპირდნენ.

აღნიშნული პრობლემის შესახებ მოსახლეობამ კითხვა ახალციხის მუნიციპალიტეტის გამგებლის მოვალეობის შემსრულებელს, ბესიკ ბლიაძეს ონლაინ რეჟიმში დაუსვა. ონლაინ კონფერენცია გასულ კვირას ახალციხის მუნიციპალიტეტის ფეისბუქის ოფიციალურ გვერდზე გაიმართა. მოსახლეობის შეკითხვა გამგებლის მოვალეობის შემსრულებელმა უპასუხოდ დატოვა.

თუმცა, ახალციხის მუნიციპალიტეტის გამგეობაში ”სამხრეთის კარიბჭეს” განუმარტეს აღნიშნული პრობლემა ქალაქის კეთილმოწყობის სამსახურმა უნდა მოაგვაროს. შპს ”კეთილმოწყობის” უფროსი ამირან ნოზაძე კი ამბობს, რომ იმისათვის, რომ სამსახურმა კონკრეტულ ფაქტთან დაკავშირებით რეაგირება მოახდინოს ”კეთილმოწყობას” განცხადებით უნდა მიმართონ. თუმცა, ამ ეტაპზე კეთილმოწყობის სამსახურში მსგავსი განცხადება არ შესულა. სამსახურს კი არც საჭირო ამწეები ჰყავს.

ადგილობრივები ალვის ხეების მოჭრას სასწრაფოდ ითხოვენ. რადგან რომელიმე ხე რომ მოტყდეს საცხოვრებელ კორპუსს დაანგრევს.

სახლებისა და სათავსოების გარდა, ფესვებმა ისედაც მწყობრიდან გამოსული საკანალიზაციო სისტემაც დააზიანა.

- ”ძველი სანიაღვრე არხია გადაკეთებული საკანალიზაციო არხად, ხის ფესვები შიგნით შედის და გასასვლელს არ აძლევს”, - ამბობს გრიგოლ ფერაძე.

ადგილობრივები ამბობენ, რომ 30 წელზე მეტია რაც ამ დასახლებაში საკანალიზაციო სისტემა არ გაწმენდილა.

საქართველოს გაერთიანებული წყალმომარაგების კომპანიის სამცხე-ჯავახეთის ფილიალში განმარტავენ, რომ პრობლემის მოსაგვარებლად საკმარისი თანხები არ აქვთ და დახმარებისთვის სათაო ოფისს მიმართეს.

- ”მოსახლეობას შევხვდი და დაველაპარაკე, რთული სამუშაოებია ჩასატარებელი და ამ ეტაპზე ფინანსები არ გვაქვს, თუმცა მოსახლეობას აუცილებლად დავეხმარებით”, - ამბობს გაერთიანებული წყალმომარაგების კომპანიის სამცხე-ჯავახეთის ფილიალის მენეჯერი გიორგი ბაგინაშვილი.



[ოთარ აწყურელი, ახალციხე]