უკვე ოცი წელია რაც ახალციხეში, მიქუტიშვილის ქუჩაზე მცხოვრებ რვა ოჯახს წყალი არ მიეწოდება. ადგილობრივები სასმელ წყალს მეზობელი ქუჩებიდან ეზიდებიან. რამდენიმე ოჯახმა კი უწყლობის გამო, საკუთარი ჭა გააკეთა.
”სასმელ წყალს მაღაზიაში ვყიდულობთ. ჭები გავაკეთეთ, მაგრამ ჭის წყალს დასალევად ვერ ვიყენებთ. მსგავსი პრობლემის წინაშე რვა ოჯახია”, - ამბობს მიქუტიშვილის ქუჩაზე მცხოვრები მაია გოგოლაძე.
მისი მეზობელი დარეჯან გვირჯიშვილი კი ამბობს, რომ წყალი 200 მეტრის სიშორიდან მოაქვს.
”წყალს მეზობლისგან ვეზიდები, მაგრამ მრიცხველი აქვს დაყენებული და ფულს ვუხდი, ზედა ქუჩას თუ აქვს წყალი, არ შეიძლება ჩვენც გვქონდეს?” - კითხულობს დარეჯან გვირჯიშვილი.
აღნიშნული პრობლემის მოსაგვარებლად ადგილობრივებმა ახალციხის მუნიციპალიტეტის გამგეობასა და გაერთიანებული წყალმომარაგების კომპანიას რამდენჯერმე მიმართეს და დახმარებასაც დაჰპირდნენ.
გელა დემეტრაძე რომ იყო გამგებელი მასთან ვიყავი და დაგვპირდა, ტრაქტორს და მილებს მოგცემთო. რაც გამგებელი შეიცვალა აღარავისთან მივსულვართ, რად უნდა ჩვენი მისვლა იქ არ დევს განცხადება?” - ამბობს მაია გოგოლაძე და ამატებს, რომ ისინი მხოლოდ ქუჩაზე ცენტრალური მილის გაყვანას ითხოვენ. შემდეგ კი ყველა ოჯახი სახლამდე წყალს საკუთარი ხარჯებით შეიყვანს.
მიუხედავად იმისა, რომ მიქუტიშვილის ქუჩას წყალი 20 წელია არ მიეწოდება, მოსახლეობას წყლის ქვითრები მუდმივად მისდით.
”შარშან 85 ლარი მომივიდა, წყალკანალში მივედი და განცხადება დავწერე. ვუთხარი, რომ წყალს თუ შემოგვიყვანდნენ გადავიხდიდით რაც გადასახდელი იყო, მაგრამ ისე გააკეთეს, რომ აბონენტთა სიიდან საერთოდ ამოგვიღეს”, - ამბობს სერგო დანელია.
მოსახლეობამ ”საქართველოს გაერთიანებული წყალმომარაგების კომპანიის” ცხელ ხაზზეც დარეკა, სადაც განუმარტეს, რომ აღნიშნულ ქუჩაზე წყლის გაყვანა უახლოეს მომავალში იგეგმება.
ის, რომ მიქუტიშვილის ქუჩაზე აღნიშნული სამუშაოებია დაგეგმილი, გაერთიანებული წყალმომარაგების კომპანიის სამცხე-ჯავახეთის ფილიალის მენეჯერი გიორგი ბაგინაშვილიც ადასტურებს.
”შევპირდი მოსახლეობას, რომ აღნიშნულ პრობლემას მოვაგვარებთ, მაგრამ ამისთვის დრო გვჭირდება. დიდი სამუშაოებია ჩასატარებელი, სხვადასხვა ტექნიკა და მასალებია საჭირო”, - ამბობს ბაგინაშვილი.
მიქუტიშვილის ქუჩის მოსახლეობა გარდა წყლის პრობლემებისა, გაუმართავ საკანალიზაციო სისტემაზე, ჩაბნელებულ ქუჩაზე და მაწანწალა ძაღლების სიმრავლეზეც საუბრობს.
”ღამე ვერ გამოივლი, ისეთი სიბნელეა. თან მაწანწალა ძაღლები არიან, მოსახლეობას გარეთ გამოსვლის ეშინია. გარდა ამისა, ქუჩაზე ფეკალური მასა ამოდის და ანტისანიტარიაა”, - ამბობს სერგო დანელია.
აღნიშნულ ქუჩაზე განათების ბოძები დამონტაჟებულია, თუმცა ელექტროსადენები გაყვანილი არაა.
ახალციხის მუნიციპალიტეტის გამეგბლის მრჩეველი იურიდიულ საკითხებში გოჩა პარუნაშვილი ამბობს რომ ქალაქის ყველა ქუჩაზე გარე განათებების მოწესრიგებისთვის სამუშაოები უკვე დაწყებულია.
”ვეცდებით აღნიშნულ ქუჩასაც შეძლებისდაგვარად დავეხმაროთ და პრობლემა მოვუგვაროთ. წყალს რაც შეეხება ეს გამგეობის კომპეტენციაში არ შედის”, - განმარტავს პარუნაშვილი.
[ოთარ აწყურელი, ახალციხე]