დანიელაშვილის ქუჩაზე ალვის ხეებს ჭრიან

ადგილობრივების თქმით, ხეები მრავალწლიანია და მოსახლეობას საფრთხეს უქმნის.

„ეზოში ბავშვები თამაშობდნენ და ყოველ წამს საშიში იყო, ტოტი არ მოტეხილიყო და ვინმეს არ დასცემოდა. ადრეც ბევრჯერ მივაკითხეთ გამგეობას, მაგრამ არავის რეაგირება არ მოუხდენია. ერთხელ მოჭრეს რამდენიმე ტოტი წინასაარჩევნოდ და ეგ იყო“, - ამბობენ ადგილობრივები.

დანიელაშვილის ქუჩაზე ათი ალვის ხე იყო, რომლის მოჭრასაც მოსახლეობა წლებია ითხოვს. სპეციალური ტექნიკის საშუალებით ხეებს უკვე მეორე დღეა ჭრიან.

„წლების განმავლობაში ამ ხალხს პრობლემა ჰქონდა და სულ იმის შიშში იყვნენ, რომ ქარის დროს ტოტები არ მოტეხილიყო და არაფერს დასცემოდა. ჩვენ დავპირდით მოსახლეობას, რომ ამ პრობლემას უახლოეს დღეებში მოვაგვარებდით და პირობა შევასრულეთ“, - განმარტავს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.

ადგილობრივი ხელისუფლების წარმომადგენლების თქმით, მოჭრილს ხეებს მოსახლეობას დაურიგებენ.


[თამარ თოთაძე, ახალციხე]