დანიელაშვილის ქუჩას ვენეციას ადარებენ

„სავსეა სარდაფები, სახლებამდე შემოაღწია. ნახევარი საათით ადრე რომ მოსულიყავით, ისეთი წყალი იყო ეზოში, თავი ვენეციაში გეგონებოდათ“, - ამბობს დანიელაშვილის ქუჩაზე მცხოვრები იგორ ჟაბინი.

ადგილობრივები ამბობენ, რომ რამდენიმე წლის წინ ზედა ქუჩებზე მცხოვრებმა მოსახლეობამ საკანალიზაციო ჭები თვითნებურად დალუქა, რის გამოც წყალი არსად აღარ გადის და დანიელაშვილის ქუჩაზე ჩამოედინება.

„არც სანიაღვრე არხებია გაკეთებული, ის ჭებიც დალუქეს. მთელი ხუთი ქუჩის წყალი მოდის ჩვენ ქუჩაზე. დაბალი ადგილია და აქ ჩერდება წყალი“, - ამბობს დანიელაშვილის ქუჩაზე მცხოვრები სვეტლანა დუგარიძე.



გარდა იმისა, რომ დანიელაშვილის ქუჩაზე მცხოვრები მოსახლეობა სანიაღვრე არხების გაკეთებას ითხოვს, მათ უკვე წლებია ეზოში ალვის ხეების მოჭრა სურთ. ადგილობრივები ამბობენ, რომ ხეები უკვე დიდი ხანია დგას და ტოტები სტყდება.

„ჩემი პატარა ჰყავდათ ბავშვებს გარეთ გამოყვანილი და ერთი მეტრით ასცდა, რომ თავში არ დასცემოდა ხის ტოტი. დაბერებული ხეებია. ადრეც ბავშვები თამაშობდნენ, ტოტი მოტყდა და გვერდზე დაეცა“, - ამბობს ამავე ქუჩაზე მცხოვრები ხათუნა ლომსაძე.

ადგილობრივების თქმით, რამდენიმე წლის წინ მუნიციპალიტეტის გამგეობას განცხადებით მიმართეს. თუმცა, მაშინ ხეებს მხოლოდ რამდენიმე ტოტი მოაჭრეს. იგივე თხოვნით გამგეობას მოსახლეობამ მას შემდეგაც მიმართა, თუმცა,მათი პრობლემით აღარავინ დაინტერესებულა.

[თამარ თოთაძე, ახალციხე]