ხანძრის მეორე დღე ბორჯომში – ცეცხლის კერებთან მისასვლელად გზას ჭრიან

როგორც ადგილზე მყოფი, "სამხრეთის კარიბჭეს" ჟურნალისტი, თინათინ ზაზაძე იუწყება, ვერტმფრენი დილიდან ინტენსიურ რეჟიმში მუშაობს. სახანძრო მანქანები კი სტიქიის ზონაში, წინა ხანძრის დროს გაჭრილი გზებით მიდიან და ასევე აქტიურად მუშაობე ცეცხლის კერებთან.

მისივე თქმით, სტიქიის ზონაში მძიმე ტექნიკას ახალი გზაც გაჰყავს.

ბორჯომის ხეობაში შექმნილია სპეციალური შტაბიც, თუმცა, ამ ეტაპზე აქ ხელისუფლების რომელიმე წარმომადგენელი არ იმყოფება. ბორჯომის ხეობაში მობილიზებულია საპატრულო სამსახური და მკაცრად კონტროლდება პერიმეტრი, ჟურნალისტებს უშლიან სტიქიის ზონასთან მიახლოებას.



საქართველოს შინაგან საქმეთა სამინისტროს საგანგებო სიტუაციების სამსახურის ინფორმაციით, დღეს დილიდან, წაღვერში, ხანძრის უმოკლეს დროში ლიკვიდირების მიზნით, სამუშაოებში ჩაერთო შსს-ს საგანგებო სიტუაციების მართვის სააგენტოს მეხანძრე-მაშველთა დამატებითი ძალები და განსაკუთრებულ დავალებათა დეპარტამენტის 200-მდე თანამშრომელი. ხანძრის კერებთან მობილიზებულია მაღალი გამავლობის ხანძარსაწინააღმდეგო ტექნიკა. ცეცხლის ქრობის პროცესში მონაწილეობს შსს-ს ვერტმფრენი.



ბორჯომის ხობაში, დაბა წაღვერში, ხანძარი გუშინ, 22 სექტემბერს, საღამოს გაჩნდა. ხანძარი იგივე უბნებზე გაჩნდა, სადაც აგვისტოს თქვეში იყო. შეგახსენებთ, ხანძარი ბორჯომის ხეობაში 20 აგვისტოს გაჩნდა და ცეცხლს მეხანძრე-მაშველები, შსს–ს თანამშრომლები, ადგილობრივი და სხვა ქვეყნების ტექნიკისა და ავიაციის დახმარებით, 8 დღის განმავლობაში აქრობდნენ.

ადგილობრვები ფიქრობენ, რომ განმეორებით ხანძარი ბორჯომში შესაძლოა ცეცხლის ძველი კერებიდან გაჩენილიყო. არ გამორიცხავენ უამინდობასაც, – გუშინ წაღვერში ძლიერი ჭექა–ქუხილი იყო და ადგილობრივების ნაწილი ფიქრობს, რომ შესაძლოა ხანძარი მეხის ჩამოვარდნას გამოეწვია.



[თინათინ ზაზაძე, ნინო ნარიმანიშვილი, ბორჯომი]