წაღვერის მცხოვრებლები ხანძრის გაჩენის მიზეზებზე [Photo/Video]

წაღვერის ტყეში კვამლი ადგილობრივებმა გუშინ, 22 სექტემბერს, დაახლოებით 16:00 საათზე შენიშნეს. მათი განმარტებით, ამ პერიოდში დაბაში წვიმდა და შესაძლოა ხანძარი მეხმა გამოიწვია.

„უცბად წვიმა დაიწყო და მეხი გავარდა, დიდი ხმა ქონდა. ჩვენ ვფიქრობთ, რომ ამჯერად მეხის ჩამოვარდნა გახდა ხანძრის გაჩენის მიზეზი. დაბიდან 3–4 კილომეტრშია კერა, ავედით, ვნახეთ და ჩვენი ვარაუდით, მიზეზი მეხია“, – ამბობს წაღვერში მცხოვრები დავით გელაშვილი.

ეთერ ტაბატაძე ფიქრობს, რომ ხანძარი შეგნებულად გააჩინეს.

„რა არის იცით საეჭვო, ერთი და იგივე ადგილზე რატომ უნდა გაჩნდეს ცეცხლი, რა აჩენს?! მეხი ადრეც ჩამოვარდნილა, მაგრამ ასეთი კატასტროფული ცეცხლი და ხანძარი არ ყოფილა“, – ამბობს ეთერ გელაშვილი.



მისივე თქმით, ადგილობრივებს იმედი აქვთ, რომ ხანძრის ლოკალიზება მალევე მოხდება, რადგან ხანძრის ქრობის პროცესში ვერტმფრენია ჩართული: "მეშინია სხვა ადგილზეც არ გაჩნდეს. ძალიან ბევრ რეგიონში იყო ხანძარი და მართლა დასაფიქრებელია რა ხდება. შიშით ვუყურებთ, რომ დასახლებისკენ არ წამოვიდეს ცეცხლი. ცდილობენ, იმედია გავიმარჯვებთ კიდევ ერთხელ“.

სხვა ვერსია აქვს დაბაში მცხოვრებ ნიკოლოზ გელაშვილს, მისი თქმით, შესაძლოა ცეცხლი ძველი ხანძრის კერებიდან გაჩნდა: “ხდება ხოლმე, როცა იმ ადგილზე ცოტა ხნის წინ ხანძარი იყო, შესაძლოა ისევ აალდეს და გაჩნდეს. მე ვფიქრობ, რომ მიზეზი ეს არის“.



ბორჯომის ხეობაში, დაბა წაღვერში, ხანძარი გუშინ, 22 სექტემბერს, საღამოს გაჩნდა. ხანძარი იგივე უბნებზე გაჩნდა, სადაც აგვისტოს თქვეში იყო. შეგახსენებთ, ხანძარი ბორჯომის ხეობაში 20 აგვისტოს გაჩნდა და ცეცხლს მეხანძრე-მაშველები, შსს–ს თანამშრომლები, ადგილობრივი და სხვა ქვეყნების ტექნიკისა და ავიაციის დახმარებით, 8 დღის განმავლობაში აქრობდნენ.

საქართველოს შინაგან საქმეთა სამინისტროს საგანგებო სიტუაციების სამსახურის ინფორმაციით, დღეს დილიდან, წაღვერში, ხანძრის უმოკლეს დროში ლიკვიდირების მიზნით, სამუშაოებში ჩაერთო შსს-ს საგანგებო სიტუაციების მართვის სააგენტოს მეხანძრე-მაშველთა დამატებითი ძალები და განსაკუთრებულ დავალებათა დეპარტამენტის 200-მდე თანამშრომელი. ხანძრის კერებთან მობილიზებულია მაღალი გამავლობის ხანძარსაწინააღმდეგო ტექნიკა. ცეცხლის ქრობის პროცესში მონაწილეობს შსს-ს ვერტმფრენი.





[თინათინ ზაზაძე, ბორჯომი]