წაღვერში ხანძრის ჩაქრობას ქარი ართულებს – ფოტო/ვიდეო მასალა სტიქიის ზონიდან

"სამხრეთის კარიბჭეს" გადამღებმა ჯგუფმა წაღვერში, სტიქიის ზონაში მისვლა მოახერხა. იქ, სადაც ჩვენი გადამღები ჯგუფი მივიდა, სტიქიის ზონის ყველაზე მაღალ წერტილში, გურული მეხანძრეები მუშაობენ. მათი თქმით, ქარის გამო მოულოდნელად ჩამქრალი კერებიც ალდება და ახალი კერებიც ჩნდება.

ნახეთ თინათინ ზაზაძის ფოტო და ვიდეო მასალები სტიქიის ზონიდან.















































ბორჯომის ხობაში, დაბა წაღვერში, ხანძარი გუშინ, 22 სექტემბერს, საღამოს გაჩნდა. ხანძარი იგივე უბნებზე გაჩნდა, სადაც აგვისტოს თქვეში იყო. შეგახსენებთ, ხანძარი ბორჯომის ხეობაში 20 აგვისტოს გაჩნდა და ცეცხლს მეხანძრე-მაშველები, შსს–ს თანამშრომლები, ადგილობრივი და სხვა ქვეყნების ტექნიკისა და ავიაციის დახმარებით, 8 დღის განმავლობაში აქრობდნენ.

ადგილობრვები ფიქრობენ, რომ განმეორებით ხანძარი ბორჯომში შესაძლოა ცეცხლის ძველი კერებიდან გაჩენილიყო. არ გამორიცხავენ უამინდობასაც, – გუშინ წაღვერში ძლიერი ჭექა–ქუხილი იყო და ადგილობრივების ნაწილი ფიქრობს, რომ შესაძლოა ხანძარი მეხის ჩამოვარდნას გამოეწვია.

საქართველოს შინაგან საქმეთა სამინისტროს საგანგებო სიტუაციების სამსახურის ინფორმაციით, დღეს დილიდან, წაღვერში, ხანძრის უმოკლეს დროში ლიკვიდირების მიზნით, სამუშაოებში ჩაერთო შსს-ს საგანგებო სიტუაციების მართვის სააგენტოს მეხანძრე-მაშველთა დამატებითი ძალები და განსაკუთრებულ დავალებათა დეპარტამენტის 200-მდე თანამშრომელი. ხანძრის კერებთან მობილიზებულია მაღალი გამავლობის ხანძარსაწინააღმდეგო ტექნიკა. ცეცხლის ქრობის პროცესში მონაწილეობს შსს-ს ვერტმფრენი.

[ნინო ნარიმანიშვილი, თინათინ ზაზაძე, ბორჯომი]