თამარაშვილის N25–ში მცხოვრებლები ეზოდან ნაგვის გატანას ითხოვენ

თამარაშვილის ქუჩის მცხოვრებლების თქმით, ორ თვეზე მეტია თავიანთ ეზოში დიდი რაოდენობით დაგროვებული ნაგავი ყრია, თუმცა წასაღებად, კეთილმოწყობის სამსახურიდან, მიმართვის მიუხედავად, არავინ მისულა.

„არაჰიგიენურია, დაბინძურებულია აქაურობა, საშინიელი სუნი დგას, ვირთხები და თაგვები აქ დარბიან, ცხელა და საშინელი მდგომარეობაა“, – ამბობს აქ მცხოვრები ნანული კვირიკაშვილი.

თამარაშვილის ქუჩის #25–ში 50–ზე მეტი ოჯახი ცხოვრობს.

„წვიმები თუ დაიწყო, მაშინ უნდა ვნახოთ აქ სანახაობა. ბავშვები არიან, თამაშობენ და მილიონ ბაქტერიებს იდებენ. მოვიდნენ, გაიტანონ ეს ნაგავი და ჩვენც დავეხმარებით დალაგებაში“, – გვეუბნება მედია მურადაშვილი.

ადგილობრივების თქმით, ეზოში საყოფაცხოვრებო ნარჩენები მას შემდეგ დარჩა, რაც ეზოს გაფართოების მიზნით სათავსოები აიღეს. მათ ნარჩენების გატანის მოთხოვნით, ორი თვის წინ დასუფთავების სამსახურსაც მიმართეს, თუმცა ამ დრომდე არავინ გამოჩენილა.

დასუფთავების სამსახურისათვის მიმართვას უარყოფს, შპს „კეთილმოწყობის“ სამსახურის უფროსი გიორგი ლონდარიძე, თუმცა, ამატებს, რომ პრობლემის შესახებ იცის და ორ დღეში ნარჩენების გატანასაც აპირებს.

„არავის არ მოუმართავს, შემთხვევით გავიარე და დავინახე, რომ ეზო მაგ დღეში იყო. ის მანქანა, რომლითაც უნდა გავიტანოთ, შესაკეთებელი მყავს. ხვალ ან ზეგ შევაკეთებთ და მოვასუფთავებთ. წესით ეგ ჩვენი ვალდებულება არ არის, ადგილობრივების სათავსოების ნარჩენებია და მათვე უნდა მიეხედათ“, – განმარტავს ლონდარიძე.





[ლუბა გიორგაძე, ახალციხე]