ახალციხის ქუჩებს არაოფიციალური ნაგავსაყრელებისგან წმენდენ

ამ წუთებში შპს „კეთილმოწყობის“ თანამშრომლები, ივანე ახალციხელის ქუჩის მიმდებარე ტერიტორიას ასუფთავებენ. საყოფაცხოვრებო ნარჩენები თანამშრომლებმა ჯერ პოლიეთილენის პარკებში მოაგროვეს, შემდეგ კი ტრაქტორით ტერიტორიაზე ორმო ამოთხარეს დარჩენილი ნარჩენები დაფლეს.

„კეთილმოწყობის“ სამსახურის უფროსის დროებით მოვალეობის შემსრულებელი გიორგი ლონდარიძე ახალციხელის ქუჩაზე მცხოვრებ მოსახლეობას მოუწოდებს, რომ ტერიტორიის დასუფთავების შემდეგ ნაგავი აღარ დაყარონ. აღნიშნულ ქუჩაზე დაემატა დასუფთავების ერთი მანქანაც. მანქანა ახალციხელის ქუჩაზე კვირაში ორჯერ ივლის.

„ამ ქუჩაზე ნაგვის ურნებს ვერ დავდგამთ, რადგან გზა არ ვარგა, წვიმის დროს გაუვალია და ნაგავმზიდი ვერ შემოვა“ , – ამბობს გიორგი ლონდარიძე.

დღესვე დაასუფთავეს მეორე საჯარო სკოლის მიმდებარე ტერიტორია და კიბეები, რომლითაც სკოლის მოსწავლეები და მიმდებარე ქუჩებზე მცხოვრები მოსახლეობა სარგებლობს. კიბეები წყლის ჭავლით ჩარეცხეს. გაითიბა მიმდებარე ტერიტორიაც.

შპს „კეთილმოწყობის“ თანამშრომლებმა ქალაქში არსებული ნაგავსაყრელების გაწმენდა, მას შემდეგ დაიწყეს, რაც „სამხრეთის კარიბჭემ“ აღნიშნულთან დაკავშირებით მასალა გამოაქვეყნა. თუმცა ლონდარიძე ამბობს, რომ აღნიშნულ ქუჩების დასუფთავება დაგეგმილი ჰქონდათ და სტატია არაფერ შუაშია.

ამ დრომდე რჩება ნაგავი, გამრეკელის ქუჩაზე, მესამე საჯარო სკოლასთან. „დასუფთავების“ სამსახურის თანამშრომლები აღნიშნული ტერიტორიის დასუფთავებას ამ ეტაპზე არ აპირებენ.

„ეს კერძო ტერიტორიაა და ჩვენ ვერ შევალთ ნებართვის გარეშე. თუ მოგვმართავენ, ჩვენი ტექნიკით დავეხმარებით“, – ამბობს გიორგი ლონდარიძე.

გამრეკელის ქუჩაზე არსებული სტომატოლოგიური კლინიკის მენეჯერი ნელი მაღრაძე კი აცხადებს, რომ შპს „კეთილმოწყობის“ ყოფილ უფროსს გიორგი ბალიაშვილს არაერთხელ სთხოვა დახმარება.

შეგახსენებთ, რომ გიორგი ბალიაშვილმა თანამდებობა საკუთარი განცხადების საფუძველზე გასულ კვირას, 14 ივლისს დატოვა.



[თინათინ ზაზაძე, ახალციხე]