სამშენებლო ნარჩენები სასწავლებლის ეზოში – პოლიტიკა თუ უდროობა

ახალციხის საზოგადოებრივი კოლეჯის დირექტორის თქმით, ნარჩენები ეზოში მას შემდეგ დაიყარა, რაც ქალაქის მერიამ კორპუსის ფასადი შეღება.

„მუშები კორპუსზე რომ იყვნენ ასულები, ნაგავს ზემოდან ისროდნენ და მთელს ეზოში იყრებოდა. თვეზე მეტია ასეა. სწავლა დავიწყე და აქაურობა სულ დანაგვიანებულია“, -ამბობს ზურაბ ბერიძე და ამატებს, რომ ფასადების შეღებვის შემდეგ სხვა კორპუსის ეზოები მოასუფთავეს და კოლეჯის ეზო დატოვეს.

ბერიძის თქმით, კოლეჯის შენობა და ფანჯრებიც საღებავით არის მოსვრილი, მერიას მიმართა და ნარჩენების აღება სთხოვა, თუმცა ტერიტორიაზე ამდრომდე არავინ გამოჩენილა.

ზურაბ ბერიძე ფიქრობს, რომ მერიის შესაბამისმა სამსახურმა ნარჩენები გამიზნულად არ გაიტანა, რადგან შენობაში დამოუკიდებელი დეპუტატის ნუგზარ პარუნაშვილის საარჩევნო შტაბია განლაგებული.

„ეს ტერიტორია კოლეჯისთვის დაქირავებული მაქვს, თუმცა ნუგზარ პარუნაშვილს ეკუთვნის და რადგან მისი შტაბიც აქ არის, არ ასუფთავებენ“, - გვეუბნება ზურაბ ბერიძე.

იმ შემთხვევაში თუ მერია ფასადების შეღებვისგან დატოვებულ ნარჩენებს არ აალაგებს, კოლეჯის დირექტორი სასამართლოში ჩივილით იმუქრება: „მოვიყვან აუდიტს, ავღწერ მიყენებულ ზიანს და სასამართლოში ვუჩივლებ“.

მერიაში აცხადებენ, აღნიშნული ტერიტორიიდან ნაგვის გატანა იმ კომპანიას ევალება, რომელიც ფასადების შეღებვას ახორციელებს და ნარჩენებს უახლოეს დღეებში გაიტანს.

„ბერიძემ, 5 სექტემბერს მოგვმართა წერილობით, რომ ნაგავი გაგვეტანა, მის განაცხადს პასუხი ვადის დაცვით გაეცემა და კომპანია ნარჩენებსაც გაიტანს“, - აცხადებენ მერიაში.





[ლუბა გიორგაძე, ახალციხე]