ნარჩენების სუნი ახალციხეში რვასართულიანი კორპუსის ბუნკერიდან არა მხოლოდ ადგილობრივებს აწუხებთ

ახალციხეში თამარაშვილის N2-ში მდებარე რვასართულიანი კორპუსის ირგვლივ ტემპერატურის მატებასთან ერთად უსიამოვნო სუნი უფრო და უფრო აუტანელი ხდება.

ნადია ბარძიმაძე, რომელიც მეორე სართულზე ცხოვრობს ამბობს, რომ პრობლემა უკვე წლებია აწუხებს: „საშინელი სუნი და ანტისანიტარიაა. ბუნკერები ქლორით უნდა გაირეცხოს!“

ბარძიმაძე ფიქრობს, რომ თუ ბუნკერს სათანადოდ არ გაწმენდენ სჯობს სრულიად გააუქმონ.

გარდა კორპუსში მაცხოვრებლებისა სუნი და ანტისანიტარია შენობის პირველ სართულზე განთავსებულ სანოტარო ბიუროშიც აწუხებთ.

„საშინელი დისკომფორტია. მომხმარებელსაც გამოუთქვამს უკმაყოფილება ამ სუნის გამო. ნაგვის გატანიდან სამი დღის განმავლობაშიც კი უსიამოვნო სუნი ისევ რჩება“, – ამბობს სანოტარო ბიუროს ხელმძღვანელი ლია მინაძე.

ქვედა სართულებზე მცხოვრებლებისგან განსხვავებით ნაგვის ბუნკერის სისტების გაუქმებას მხარს არ უჭერენ ზედა სართულის ბინადრები.

„რთულია მეექვსე და მეშვიდე სართულიდან ნაგავი ჩამოიტანო. ხანდახან ოჯახის ახალგაზრდა წევრები არ არიან სახლში და მოხუცებს უჭირთ ჩატანა“, – ამბობს მეშვიდე სართულზე მცხოვრები კახა კახნიაშვილი და ამატებს სისტემის გაუქმებას ჯობს დეზინფექცია ჩაატარონ.

„კეთილმოწყობის“ სამსახურის უფროსი გიორგი ლონდარიძე ამბობს, რომ ამ პრობლემის შესახებ იცის და ცდილობს მოაგვაროს: „რამდენჯერმე ვიყავი მოსახლეობასთან მისული, შევთავაზე დაგველუქა და აქვე ახლოს ახალი ნაგვის ურნები დაგვედგა, მაგრამ ყველას არ უნდა. მეუბნებიან მერვე სართულიდან ნაგავი სად ვატაროთო?!“

მისივე თქმით, ყოფილა შემთხვევა, როცა მოსახლეობამ ბუნკერი სამშენებლო ნარჩენებით გაავსო და „კეთილმოწყობის“ სამსახურს დახმარებისთვის მიმართა: „ჩვენ მივეცით მანქანა და ნარჩენების გატანაში დავეხმარეთ“.

„კეთილმოწყობის“ სამსახურის უფროსი პრობლემის მიზეზად მოსახლეობის განსხვავებულ აზრს ასახელებს: „არაა მოსახლეობა ერთსულოვანი. რა უფლება მაქვს ვიღაცას რაღაცა ავუკძალო თვითონ თუ არ უნდა?!“.

შეკითხვაზე როდის მოგვარდება პრობლემა ლონდარიძე გვპასუხობს: „სანამ ყველა იქ მცხოვრები არ მიხვდება რომ ეგ არის უბედურება და საშინელება მანამდე ყველაფერი ისე დარჩება როგორცაა“.




[ნანა მიქელაძე, ახალციხე]