ზარზმელის ქუჩის #55–ში მცხოვრებლები ეზოს მოწესრიგებას ითხოვენ

საცხოვრებლის ეზო ბოლოს როდის მოასფალტდა ზარზმელის ქუჩაზე, #55–ე კორპუსის მცხოვრებლებს არ ახსოვთ. ამბობენ, რომ კორპუსში ასზე მეტი ოჯახი ცხოვრობს, მცირეწლოვანი ბავშვებიც ბევრნი არიან.

„სულ კენჭები ყრია და ეზოში ორმოებია, ბავშვები თამაშობენ და სულ მტვერში არიან, რამდენჯერ შეილება დავუშალოთ პატარებს ეზოში თამაში“, – ამბობს აქ მცხოვრები მერი ზედგინიძე.

ადგილობრივები ამბობენ, რომ ეზოდან მტვერი და მიწა მათ სადარბაზოებში და სახლებში შედის.

„სისუფთავე ხომ უნდა იყოს, მთელი დღე ცოცხებით დავდივართ და სადარბაზოებსა და სახლებს ვასუფთავებთ“,–გვეუბნება #55–ე კორპუსში მცხოვრები როზა ზაზაძე.

ადგილობრივების თქმით, ეზოს მოასფალტებას ჯერ კიდევ ზარზმელის ქუჩაზე კორპუსებთან მისასვლელი გეზების მოასფალტებისას ითხოვდნენ: „ირგვლივ ყველას ეზო მოაასფალტეს, ჩვენ გვითხრეს, რომ პროექტში არ იყო ჩასმული და ასეთ მდგომარეობაში დაგვიტოვეს“.

ადგილობრივები ამბობენ, რომ პრობლემით მერიას არაერთხელ მიმართეს, თუმცა უშედეგოდ.

„აქამდე სიტყვიერად ვთხოვდით მერიას ეზო მოეასფალტებინა, მაგრამ ახლა ხელმოწერებს შევაგროვებთ და განცხადებას შევიტანთ, იქნებ მაშინ მაინც მოგვხედონ“, – გვეუბნება მერი ზედგინიძე.

ახალციხის მერიაში ამბობენ, რომ მიმდინარე წელს ზარზმელის ქუჩაზე, #55–ე კორპუსის ეზო ვერ მოასფალტდება, რადგან არცერთ პროექტში, რომელიც ქალაქში ქუჩებისა და კორპუსის ეზოების მოასფალტებას ითვალისწინებს, გაწერილი არ არის. გაითვალისწინებენ თუ არა ამ ეზოს პრობლემას მომავალი წლის ბიუჯეტში, ჯერ მერიაში ვერც ამაზე საუბრობენ.





[ლუბა გიორგაძე, ახალციხე]