'დემოკრატ მესხთა კავშირი' სპეციალური საჭიროების მქონე ბავშვებს საჩუქრად წიგნებს გადასცემს

დღეს, 8 აპრილს, ახალციხის მეშვიდე საჯარო სკოლა, „მწვანე სახლი ახალციხის ფილიალი“ და ასევე, ადიგენის მუნიციპალიტეტის სოფელ არალში შშმპ სარეაბილიტაციო ცენტრი "ერთობა" საჩუქრად წიგნებს მიიღებენ.

არასამთავრობო ორგანიზაცია „დემოკრატ მესხთა კავშირმა“ მათთვის წიგნები „პალიტრა მედიის“ აქციის ფარგლებში შეიძინა. ორგანიზაციამ სამცხე–ჯავახეთში ერთ ტონაზე მეტი მაკულატურა მოაგროვა და ათასი ლარის ფარგლებში თბილისიდან დაახლოებით 100 წიგნი ჩამოიტანა.

„ადრე აქცია გვქონდა მეშვიდე საჯარო სკოლაში და გვთხოვეს თუ საშუალება იქნებოდა ბავშვებისთვის ხმოვანი წიგნები გადაგვეცა, ეს თხოვნა გავითვალისწინეთ და მათთვის ხმოვანი წიგნები წამოვიღეთ“, – ამბობს „დემოკრატ მესხთა კავშირის" წარმომადგენელი ჯაბა ნათენაძე და ამატებს, რომ თითქმის ყველა ჟანრის წიგნია, მათ შორის მსოფლიო ლიტერატურიდანაც.

"დემოკრატ მესხთა კავშირი" აქტიური მონაწილეობისთვის წიგნებს საჩუქრად ბორჯომის საგანმანართლებლო რესურსცენტრსაც გადასცემს.



[თამუნა უჩიძე, ახალციხე]