აბასთუმნის მთაში ფიქრობენ, რომ ხანძარი მეხისგან გაჩნდა

ზეკარის უღელტეხილი. 30.08.17. ფოტო: თინათინ ზაზაძე/სამხრეთის კარიბჭე

"სამხრეთის კარიბჭემ" სტიქიის ზონაში იმ ადგილას მისვლა შეძლო, საიდან ხანძარი დაახლოებით ორ კილომეტრშია. როგორც ჟურნალისტი თინათინ ზაზაძე გვიყვება, იმ ადგილას ზაფხულის პერიოდში რამდენიმე ოჯახი ცხოვრობს. ახლა იქ მყოფები ამბობენ, რომ იქ სადაც ხანძარი გაჩნდა, ადამიანები არ დადიან და შესაბამისად, გამორიცხულია ხანძარი დაუდევრობის შედეგი იყოს.

"დაახლოებით ორი თვეა აქ ვარ, ხუთი ოჯახი ვცხოვრობთ, საქონელი გვყავს. მაგ ადგილზე, ჩვენგან 2 კილმეტრშია, ხანძარი თუ იყო არ ვიცოდით, ვიდრე ვერტმფენმა არ დაიწყო ფრენა. ჩვენ ვფიქრობთ, რომ ცეცხლი მეხისგან გაჩნდა, იმიტომ, რომ მარიამობის ღამეს, მთაში, ძლიერი ჭექა–ქუხილი იყო", – გვეუბნება ნაზი სტურუა, რომელიც გამოსაზაფხულებლად მთაში დაბა აბასთუმნიდან ამოვიდა.

ამ ადგილას, აბასთუმანი–ბაღდათის უღელტეხილთან, ამ დროისათვის სასწრაფო სამედიცინო დახმარებისა და მეხანძრეების რამდენიმე ჯგუფია მობილიზებული. მეხანძრეები მცხეთიდან და ხაშურიდან არიან და სამუშაოებში ჩასართველად გამოძახებას ელიან.

ჟურნალისტის თქმით, ეს არის ბოლო წერტილი, სადაც მისვლა შეიძლება და ამ დროისათვის ამ ადგილზე არიან სამცხე–ჯავახეთის სამხარეო ადმინისტრაციისა და ადიგენის გამგეობის წარმომადგენლებიც. ცეცხლის კერები არ ჩანს, რადგან ძლიერი ნისლია.













[თინათინ ზაზაძე, ნინო ნარიმანიშვილი, ადიგენი]