ახალციხის მახლობლად, არჯულის მთაში ხანძარი გაჩნდა

მთავარი → სამართალი » შემთხვევა 02.05.2014

დღეს, 2 მაისს ახალციხის მუნიციპალიტეტის სოფელ ანდის მახლობლად, არჯულის მთაში მინდორს ცეცხლი გაუჩნდა. ხანძრის გამომწვევი მიზეზები ამ დროისთვის უცნობია. მეხანძრეებმა ხანძარი ნახევარ საათში ჩააქრეს.

ახალციხის მახლობლად, არჯულის მთაში ხანძარი გაჩნდა

ახალციხის სახანძრო-სამაშველო სამსახურს არჯულის მთაში გაჩენილი ხანძირს შესახებ ინფორმაცია „სამხრეთის კარიბჭემ“ მიაწოდა.
როგორც სახანძრო-სამაშველო სამსახურში განმარტეს, ტერიტორიის დასაზვერად და ვითარების გასარკვევად სამსახურის უფროსი მეხანძრეებთან ერთად მსუბუქი მანქანით 16:45 საათზე გავიდა.

ახალციხის სახანძრო-სამაშველო სამსახურის უფროსი პაატა კბილაშვილი განმარტავს, რომ იყო საშიშროება ცეცხლი ტყესაც გასჩენოდა: "ცეცხლი ბალახს ეკიდა. დაახლოებით ნახევარ საათში ჩავაქრეთ და სახანძრო მანქანის აყვანა აღარ დაგვჭირდა. ხანძარი ლიკვიდირებულია და უკან, ახალციხეში ვბრუნდებით".

მისივე თქმით, არჯულის მთაში ხანძრის პირველი შემთხვევა არ არის. დაახლოებით ორი კვირის წინ ცეცხლი ისევ ბალახს ეკიდა. ამ დროს სახანძრო მანქანის გამოძახება გახდა აუცილებელი. ამ შემთხვევაშიც ხანძრის გამომწვევი მიზეზი უცნობია.

[თინათინ ზაზაძე, ახალციხე]