სოფელ დაბის რწმუნებული: ხანძარი დასახლებიდან ერთ კილომეტრშია

გამგებლის წარმომადგენელი სოფელ დაბაში, ზაირა ფალველიანი ამბობს, რომ ძლიერი ქარის გამო ცეცხლის კერები სოფლის მიმართულებით მიიწევს, თუმცა მოსახლეობას საფრთხე არ ემუქრება, რადგან სახანძრო–სამაშველო სამსახურის ბრიგადები დაბის მიმდებარე ტერიტორიაზე ამ დრომდე რჩებიან: „დასახლებიდან ხანძარი ერთ კილომეტრშია, თუმცა მოსახლეობას საფრთხე არ ემუქრება. ვერტმფრენი დილის 6 საათიდან მუშაობს. აზებაიჯანიდან ვერტმფრენი უკვე მოსულია და ისიც ჩაერთო პროცესში“.

მისივე თქმით, ხანძრის ადგილზე ძლიერი დაკვამლიანებაა. იმ ადგილას კი, საიდანაც საშიშროებაა რომ ხანძარი დასახლებულ პუნტქს მიუახლოვდეს, მეხანძრების დიდი რაოდენობაა მობილიზებული, ადგილზე იმყოფებიან მოხალისეებიც: „მთის ძირში ისეთი ადგილია, რომ სახანძრო მანქანები მიდიან, მოსახლეობას საფრთხე არ ემუქრება, არც ევაკუაციაა საჭირო“.

[თინათინ ზაზაძე, ბორჯომი]