აბასთუმანში ადგილობრივებმა მობილიზაცია გამოაცხადეს – ცეცხლი უღრან, მიუვალ ტყეშია

შემთხვევის ადგილამდე ჯერ არც საქართველოს შინაგან საქმეთა მინისტრი გიორგი მღებრიშვილი მისულა, რომელმაც აბასთუმანში სოფელ სვირიდან გადაინაცვლა.

მინისტრის თქმით, მისი ინფორმაციით ცეცხლი უღრან ტყეშია გავრცელებული.

"ადგილზე არიან ადგილობრვები, მათ მიასწრეს მეხანძრე–მაშველებს. როგორც მეუბნებიან დიდი დაკვამლიანებაა, ღია კერებია, ადგილზე 100 კაცამდე მუშაობს. სირთულეს ქმნის მიუვალობა, უღრანი ტყეა, როგორც ადგილობრივები ამბობენ, იქ დაახლოებით 10–15 წელიწადია ხე არ მოჭრილა. ასე რომ, სპეცტექნიკაა გამოსაძახებელი სასწრაფოდ", – განაცხადა საქართველოს შინაგან საქმეთა მინისტრმა გიორგი მღებრიშვილმა "საზოგადოებრივი მაუწყებლის" ჟურნალისტთან საუბრისას.

ამ დროისათვის ადგილობრივები ბორჯომ–ხარაგაულის ეროვნული პარკის შესასვლელში იკრიბებიან. ამ ადგილს პოლიცია აკონტროლებს, პარკის შეიგნით არ უშვებენ მანქანებს.

შემთვხვევის ადგილზე მუშაობს "სამხრეთის კარიბჭეს" ჟურნალისტიც, ის ტყეში, ხანძრის ადგილასაა წასული და ამ დროისთვის ჩვენ ვერ ვახერხებთ მასთან დაკავშირებას მობილური კაშირგაბმულობის არარსებობის გამო.

შეგახსენებთ, დღეს, 29 აგვისტოს, ხანძარი გაჩნდა აბასთუმანშიც. ადგილზე ცოცხალი ძალა, სახანძრო ტექნიკა და მეტყევეები მუშაობენ. სვირიდან აბასთუმანში გადაინაცვლა ვერტმფრენმაც.

[ნინო ნარიმანიშვილი, ბორჯომი]